Մարգարիտա Սիմոնյանը հայտնել է քաղցկեղի ախտորոշման մասին

RT հեռուստաալիքի և «Россия сегодня» մեդիախմբի գլխավոր խմբագիր Մարգարիտա Սիմոնյանը բացահայտել է, որ իր մոտ հայտնաբերվել է քաղցկեղ։ Լուրը նա հայտնել է Տելեգրամի իր ալիքում՝ ընդգծելով, որ արդեն բուժում է ստանում։

«Կուզենայի գրել, որ ամեն ինչ լավ է, բայց չեմ սիրում ստել։ Տիգրանը դեռ կոմայի մեջ է, իսկ ես քաղցկեղի դեմ բուժում եմ անցնում», — գրել է Սիմոնյանը՝ նկատի ունենալով իր ամուսնուն՝ ռեժիսոր Տիգրան Քեոսայանին։ Նա հավելել է, որ շուտով հանրությունը իրեն կտեսնի արդեն տարատեսակ կեղծամներով։

«Շուտով կտեսնեք ինձ կեղծամներով։ Մենք միասին կընտրենք, թե որն է ավելի հարմար»,-գրել է Սիմոնյանը:

Ավելի վաղ՝ սեպտեմբերի 7-ին, Սիմոնյանը հեռուստաեթերում հայտնել էր ծանր հիվանդության մասին՝ առանց մանրամասներ նշելու։ Սեպտեմբերի 9-ի գիշերը նա տեղեկացրել էր, որ վիրահատվել է կրծքավանդակի շրջանում։