Թրամփի աշխարհում թուլությունը չի ներվում, դրանից օգտվում են․ Politico

Եվրոպան կարող է հայտնվել ԱՄՆ նախագահ Դոնալդ Թրամփի «քծնանքի ծուղակում»։ Հայտարարել է վերլուծաբան Ջերեմի Շապիրոն, գրում է Politico պարբերականը։

Վերլուծաբանը նշել է՝ Թրամփի՝ Սպիտակ տուն վերադառնալուց ի վեր Եվրոպայի երկրները համաձայնեցրել են նրա հետ վարքագծի ընդհանուր ռազմավարությունը՝ «քծնել, հաճոյանալ և շեղել»: Նրա խոսքով՝ եվրոպացի առաջնորդները որոշել են՝ կկարողանան կանխել ԱՄՆ նախագահի զայրույթի պոռթկումներն ու պատժիչ միջոցները՝ շարունակելով անձնատուր լինել նրա ունայնությանը:

«Բայց դա ծուղակ է։ Չկա որևէ ապացույց, որ Թրամփին շողոքորթելը հանգեցնում է ավելի լավ քաղաքական արդյունքների: Ընդհակառակը, նա կարծես միայն խրախուսում է նրան ավելի ու ավելի շատ պահանջներ ներկայացնել», - հայտնել է աղբյուրը։ Փորձագետն ընդգծել է՝ ամերիկացի առաջնորդի քծնանքը թանկ կարժենա եվրոպացիների համար, քանզի այն թուլության մասին է ազդարարում: «Իսկ Թրամփի աշխարհում, որտեղ ամեն ինչ որոշում են գործարքները, թուլությունը չի ներվում, դրանից օգտվում են», - եզրափակել է վերլուծաբանը: