Ամերիկյան մասնավոր հատվածի ակտիվ ներգրավվածությունը կխթանի մեր տնտեսությունը և կայունությունը. Վահագն Խաչատուրյան

Աշխատանքային այցով ԱՄՆ Նյու Յորք քաղաքում գտնվող նախագահ Վահագն Խաչատուրյանը ելույթ է ունեցել Կոնկորդիա համաժողովում:

Ստորև ներկայացնում ենք նախագահի ելույթը:

«Տիկնայք և պարոնայք,

Ինձ համար առանձնահատուկ պատիվ է ներկայացնել Հայաստանը այս կարևորագույն հարթակում և ելույթ ունենալ նման պատվավոր հանդիսատեսի առջև։

2025 թվականի Կոնկորդիա ամենամյա գագաթնաժողովի անցկացման ժամանակը և համատեքստը խորապես խորհրդանշական են, իսկ օրակարգը՝ համընդհանուր նշանակության։ Մենք այստեղ ենք հավաքվել՝ մեր ժամանակների առաջատար մտքերից արժեքավոր պատկերացումներ ստանալու և ուշադրությամբ լսելու մեր գործընկերների խոսքը, այն պահին, երբ ընդամենը մի քանի թաղամաս այն կողմ ընթանում է միջազգային դիվանագիտության ամենասպասված շաբաթը:

Ուրախ եմ հնարավորություն ունենալու՝ ներկայացնելու Հայաստանի առանցքային ձեռքբերումները և մեր տեսլականը՝ զարգացման առավել կայուն և բարեկեցիկ ուղու ձևավորման վերաբերյալ:

Հարավային Կովկասի փոթորկալից տարածաշրջանում գտնվող, համեմատաբար փոքր, բայց ժողովրդավարական ձգտումներով Հայաստանը երկար տարիներ հաղթահարել է բազմազան մարտահրավերներ՝ երբեք չհրաժարվելով իր ժողովրդի համար` զարգացած ու բարեկեցիկ պետություն կառուցելու տեսլականից։

Չնայած հակամարտություններով ու տնտեսական դժվարություններով լի անցյալին՝ մեր երիտասարդ պետությունը մշտապես դրսևորել է տոկունություն ու ուժ, մնացել է հավատարիմ խաղաղության, կայունության և ավելի լավ ապագայի կառուցման հանդեպ հանձնառությանը։ Մենք շարունակաբար ձգտել ենք կառուցողական երկխոսության, տարածաշրջանային համագործակցության և երկարաժամկետ լուծումների, որոնք ճանապարհ են հարթում բարեկեցության ու հաշտության համար։

Տիկնայք և պարոնայք,

Օգոստոսի 8-ին Վաշինգտոնում՝ ԱՄՆ նախագահ Դոնալդ Թրամփի անձնական ներգրավվածությամբ, Հայաստանի և Ադրբեջանի միջև գրանցվել է պատմական նշանակություն ունեցող ձեռքբերում, որը մեր տարածաշրջանում խաղաղության նոր դարաշրջան է խոստանում։

Հայաստանի և Ադրբեջանի միջև խաղաղության ու միջպետական հարաբերությունների հաստատման մասին համաձայնագիր նախաստորագրվեց, իսկ Հայաստանի, Ադրբեջանի և Միացյալ Նահանգների ղեկավարները ընդունեցին համատեղ հռչակագիր։ Սա աննախադեպ առաջընթաց էր տարածաշրջանային հարաբերությունների վերաիմաստավորման ուղղությամբ:

Այդ հռչակագրի համաձայն՝ Հայաստանը և ԱՄՆ-ն միասին կաշխատեն իրականացնել «Թրամփի ուղին` հանուն միջազգային խաղաղության և բարեկեցության», որը «Խաղաղության խաչմերուկ» նախագծի առանցքային բաղադրիչն է։ Վերջինս նախատեսում է տարածաշրջանում հաղորդակցության բարդ ճանապարհների կառուցում և վերականգնում՝ հիմնված պետությունների ինքնիշխանության, տարածքային ամբողջականության և իրավասության վրա։

«Խաղաղության խաչմերուկ» նախագիծը, ինչպես նաև կապի ոլորտում ներդրումների, էներգետիկ անվտանգության և Հայաստանի կիսահաղորդչային արտադրության ընդլայնման վերաբերյալ հետագա պայմանավորվածությունները կդառնան մեր փոխշահավետ համագործակցության առանցքը ԱՄՆ-ի հետ։ Միևնույն ժամանակ, ամերիկյան մասնավոր հատվածի ակտիվ ներգրավվածությունը կխթանի մեր տնտեսությունը և կայունությունը։

Բաց սահմանները, առևտրի դիվերսիֆիկացումը, միջազգային տրանսպորտային ու էներգետիկ այլընտրանքային ուղիները կխթանեն երկարաժամկետ տնտեսական աճը՝ Հարավային Կովկասը փոխակերպելով հակասությունների տարածաշրջանից կայուն ու բարեկեցիկ տարածաշրջանային և գլոբալ տրանսպորտային և հաղորդակցական հանգույցի։ Սա այն տեսլականն է ու նպատակը, որին մենք հաստատակամորեն հետևում ենք։

Տիկնայք և պարոնայք,

Մեր արտաքին քաղաքականության շրջանակում մենք մեծապես բարձրացրել ենք միջազգային համայնքի հետ ներգրավվածության մակարդակը և վերականգնել ենք հարաբերությունները ինչպես Արևմուտքի, այնպես էլ Արևելքի հիմնական գործընկերների հետ, այդ թվում՝ Եվրոպական միության, Հնդկաստանի և այլոց։

Ուրախ եմ տեղեկացնել, որ 2026-ին Հայաստանը կհյուրընկալի երկու կարևոր միջազգային միջոցառումներ՝ Կենսաբազմազանության մասին կոնվենցիայի Կողմերի համաժողովը (COP17) և Եվրոպական քաղաքական համայնքի 8-րդ գագաթնաժողովը։ Այս նախաձեռնությունները Հայաստանի երկարաժամկետ ռազմավարության մի մասն են՝ միջազգային ասպարեզում ավելի առանցքային դեր ստանձնելու և մեր սեփական յուրահատուկ ներդրումը կատարելու մեր ընդհանուր նպատակների առաջմղման գործում։

Ակնհայտ է դառնում, որ համընդհանուր խնդիրները, ինչպիսիք են կլիմայական փոփոխությունը, կենսաբազմազանության կորուստը, էներգետիկ ռեսուրսների սակավությունը և անկանխատեսելի քաղաքական միջավայրը պահանջում են համատեղ արձագանք, և մենք պատրաստ ենք ակտիվորեն համագործակցել մեր բոլոր գործընկերների հետ՝ այս խնդիրները հաղթահարելու և բոլորիս օգտին լուծումներ գտնելու համար։

Սրան հասնելու համար անհրաժեշտ է կայուն և ապագային ուղղված տնտեսություն, որը ունակ կլինի դիմակայելու գալիք մարտահրավերներին։ Այսօր Հայաստանը որդեգրել է կայուն զարգացման ուղի՝ օգտվելով իր ժողովրդի գիտական և նորարարական ներուժից։ Բիզնեսի համար բարենպաստ միջավայրը, որն ապահովում է բարձր տեխնոլոգիաների և ՏՏ ոլորտի աճը, ստեղծել է բոլոր անհրաժեշտ նախադրյալները՝ ներգրավելու միջազգային առաջատար ընկերությունների` NVIDIA-ի, AMD-ի և այլ միջազգային հսկաների կողմից ուղղակի օտարերկրյա մեծածավալ ներդրումները։

Հայաստանի կառավարության աջակցությունը դրամաշնորհների, հարկային արտոնությունների և ազատ տնտեսական գոտիների միջոցով, նպաստել է այս ոլորտի արագ աճին՝ Հայաստանը վերածելով տարածաշրջանային առաջատարի և հաստատելով մեր կերպարը՝ որպես ապագային միտված երկրի։ Հայաստանը լիովին ընդունում է թվայնացման և արհեստական բանականության դարաշրջանը, սակայն մեծ կարևորություն է տալիս այդ գործընթացի պատասխանատու կերպով իրականացմանը` հատուկ ուշադրություն դարձնելով կայունությանը, անվտանգությանը և համապարփակությանը։

Բացի դրանից, Հայաստանի ընդհանուր տնտեսությունը վերջին 7 տարիներին գրանցել է նշանակալի առաջընթաց՝ աճելով ավելի քան 43 տոկոսով։ Սա բացառիկ ցուցանիշ է, որը վկայում է մեր մրցունակության մասին: Այս ամենը հնարավոր չէր լինի առանց մեր երկրի ժողովրդավարական հիմքերի, որոնք ապացուցել են իրենց տոկունությունը:

Կոռուպցիայի դեմ պայքարին ուղղված հաջող միջոցառումները, ֆինանսական թափանցիկությունը, արդիականացված հարկային մեխանիզմները, ինչպես նաև օրենքի գերակայությունը, հիմնարար ազատություններն ու մարդու իրավունքները պահպանելու մեր հանձնառությունը վճռորոշ դեր են ունեցել մեր առաջընթացում:

Հարգելի ընկերներ,

Ցանկանում եմ կոչ անել ձեզ բոլորին ավելի մոտիկից ծանոթանալ Հայաստանին՝ մի երկրի, որը, չնայած աշխարհագրական սահմանափակումներին և բազմազան մարտահրավերներին, փորձում է կառուցել իր հաջողության պատմությունը՝ հեռու նորարարության ավանդական կենտրոններից։ Հայաստանը բաց է բոլորի համար՝ միջազգային գործընկերների և բիզնեսների, և պատրաստ ենք ողջունելու յուրաքանչյուրին, ով ցանկանում է մեզ հետ նոր հնարավորություններ բացահայտել։

Շնորհակալություն ուշադրության համար և մաղթում եմ արդյունավետ քննարկումներ գագաթնաժողովի շրջանակում»։