Ալիևի ներկայացուցիչը խոսել է Հայաստանի տարածքով 43 կիլոմետրանոց ավտոմայրուղու և երկաթուղու կառուցման մասին

«Անցյալ ամիս Վաշինգտոնում Ադրբեջանի և Հայաստանի միջև խաղաղության պայմանագրի նախաստորագրումից հետո մտնում ենք Հարավային Կովկասի տարածաշրջանում նոր պատմական դարաշրջան, և, հետևաբար, մենք նպատակահարմար համարեցինք մեր ավստրիացի գործընկերներին և բարեկամներին տեղեկացնել ստեղծված իրավիճակի մասին»։

Ըստ APA-ի, այս մասին «Austria Press Agency»-ին տված հարցազրույցում հայտարարել է Ադրբեջանի նախագահի հատուկ հանձնարարությունների գծով հատուկ ներկայացուցիչ Էլչին Ամիրբեկովը։

Նա նորից հայտարարել է, թե ՀՀ Սահմանադրության նախաբանում կան տարածքային պահանջներ Արցախի վերաբերյալ։

«Ստորագրված խաղաղության պայմանագիրը ենթադրում է տարածքային պահանջներից փոխադարձ հրաժարում», - նշել է Ամիրբեկովը։

Նա ընդգծել է, որ տարածաշրջանն ունի երկարատև խաղաղության և կայունության հսկայական ներուժ։

Ամիրբեկովը կարևոր քայլ է համարել Հայաստանի տարածքով 43 կիլոմետրանոց ավտոմայրուղու և երկաթուղու կառուցումը, որը Ադրբեջանը կկապի Նախիջևանի հետ։ «Խոսքը ոչ միայն Ադրբեջանի երկու մասերի վերամիավորման, այլև Հայաստանի և Ադրբեջանի, ինչպես նաև Ասիայի և Եվրոպայի միացման մասին է», - ասել է նա։

«Սա խաղաղության նախագիծ է, որից, քաղաքական կամքի առկայության դեպքում, տարածաշրջանում բոլորը կարող են օգտվել», - ասել է նա՝ մեկնաբանելով Իրանի քննադատությունը։