Նիկոլ Փաշինյանը ՀՀ նախկին նախագահներին մեղադրեց Հայաստանը պատերազմում ներքաշելու մեջ

Հայաստանի վարչապետ Նիկոլ Փաշինյանն արձագանքեց ՀՀ նախկին նախագահներ Լևոն Տեր-Պետրոսյանի, Ռոբերտ Քոչարյանի և Սերժ Սարգսյանի հայտարարություններին, որոնք իրեն մեղադրում են 44-օրյա պատերազմը հրահրելու և Հայաստանը պատերազմի մեջ ներքաշելու համար։  

Վարչապետն այս հարցին անդրադարձավ Ժողովրդավարության հայկական ֆորումի շրջանակում «Ժողովրդավարության որակը Հայաստանում. մարտահրավերներ և գնահատման ցուցիչներ» թեմայով պանելային քննարկման ընթացքում։

«Եթե մենք ներքաշել ենք պատերազմի մեջ, 2018 թվականի դրությամբ 18 տարեկան զինվորը ՀՀ միջազգայնորեն ճանաչված տարածքից դուրս ի՞նչ գործ ուներ։ Բա ինչո՞ւ չենք խոսել սրա մասին. եթե խոսել են, դավաճանություն է համարվել։ Մարդիկ, որոնք Հայաստանը ներքաշել են պատերազմի մեջ իրենց քաղաքական գործունեության առաջին օրից, ներքաշել են քիչ չի, կեսից էլ փախել են, գնացել՝ իրենց տանը նստել, այսօր մեզ մեղադրում են, ասում են՝ Հայաստանը ներքաշել եք պատերազմի մեջ»,- ասաց վարչապետը։ 

Հայաստանի վարչապետը հռետորական հարց ուղղեց՝ արդյոք Հայաստանը պատերազմի մեջ չի՞ եղել 2019, 2018, 2017, 2016 և դրան նախորդող տարիներին։ 

«Բա այդ ոնց եղավ, որ Նիկոլ Փաշինյանը Հայաստանը ներքաշեց պատերազմի մեջ»,- եզրափակեց վարչապետը։ 

Հայաստանի վարչապետ Նիկոլ Փաշինյանը ՀՀ նախկին 3 նախագահներ Լևոն Տեր-Պետրոսյանի, Ռոբերտ Քոչարյանի, Սերժ Սարգսյանի հայտարարություններին արձագանքել էր նաև ֆեյսբուքյան գրառմամբ։