ԱՄՆ գանձապետարանը փրկօղակ է նետում Արգենտինային

ԱՄՆ գանձապետարանի ղեկավար Սքոթ Բեսենթը հայտարարել է, որ պատրաստ է «մեծ և վճռական» քայլերով աջակցել Արգենտինային՝ օգտագործելով դեռ 1934-ին ստեղծված արտակարգ Exchange Stabilization Fund-ը։ Այս քայլը, որն արդեն կարճաժամկետ դրական ազդել է պեսոյի և տեղական ակտիվների վրա, համընկնում է նախագահ Դոնալդ Թրամփի և Արգենտինայի նախագահ Խավիեր Միլեյի հանդիպման հետ Նյու Յորքում։ Ֆոնդի մոբիլիզացվող ռեսուրսները գնահատվում են շուրջ 30 միլիարդ դոլար։

Փորձագետները նշում են, որ ԱՄՆ-ի նման աջակցությունը կարող է Միլեյին կարճաժամկետ քաղաքական առավելություն ապահովել առաջիկա ընտրություններից առաջ։ Սակայն հնարավոր վարկային պայմանները կարող են էլ ավելի բարդացնել Արգենտինայի արդեն ծանր պարտքային բեռը։ Բացի այդ, նման աջակցությունը կարող է երկրորդ պլան մղել այլ վարկատուներին, օրինակ՝ Չինաստանին։

ԱՄՆ գանձապետարանը նախկինում էլ է օգտագործել այս ֆոնդը՝ 2008-ի և 2020-ի ֆինանսական ճգնաժամերի ժամանակ, ինչպես նաև Մեքսիկայի, Բրազիլիայի և Ուրուգվայի ճգնաժամերի ընթացքում։ Սակայն տնտեսագետները զգուշացնում են․ առանց համակարգային բարեփոխումների ու վստահության վերականգնման, նման աջակցությունը կարող է պարզապես ժամանակ շահել, իսկ շուկաները շարունակում են հիշել Արգենտինայի մեկ դար շարունակվող գերդրամատվածությունը, հիպերինֆլյացիան և դեֆոլտները, փոխանցում է Reuters-ը։