Ֆրանսիայում քաղաքապետարաններին արգելել են բարձրացնել Պաղեստինի դրոշը

Ֆրանսիայի նախագահ Էմանուել Մակրոնի Պաղեստինի պետականության ճանաչումից հետո տասնյակ քաղաքապետարաններ բարձրացրել էին պաղեստինյան դրոշներ՝ որպես համերաշխության նշան։ Սակայն երկրի Ներքին գործերի նախարարությունը կարգադրել է դրանք իջեցնել՝ պատճառաբանելով, որ այդ քայլը խախտում է պետական շենքերի չեզոքության սկզբունքը։

Որոշ քաղաքապետեր հայտարարեցին, որ որոշումն անհեթեթ ու կեղծավոր է։ Նանտեր քաղաքի քաղաքապետ Ռաֆայել Ադամը նշեց․ «Կառավարությունը չի կարող միաժամանակ ճանաչել Պաղեստինը և արգելել դրոշը բարձրացնել»։ Քաղաքում դրոշը բարձրացվել էր պաշտոնական արարողությամբ, սակայն հաջորդ օրը դատարանը պահանջեց այն իջեցնել։ Մյուս պաշտոնյաները հիշեցրել են, որ ուկրաինական դրոշները ազատորեն ցուցադրվել են, անգամ՝ Էյֆելյան աշտարակի վրա։

Ներքին գործերի նախարարությունը պատասխանել է, որ Գազայի պատերազմը Ֆրանսիայում առաջացրել է լարվածություն և ցույցեր, ու պաղեստինյան դրոշները կարող են հրահրել անկարգություններ։ Չնայած դրան, ըստ նախարարության, արդեն 86 քաղաքապետարան հասցրել էր բարձրացնել այդ դրոշը։ Ֆրանսիայի-Պաղեստինյան համերաշխության ասոցիացիան և մի շարք իրավաբաններ քննադատել են այս որոշումը՝ շեշտելով, որ «ճնշման իրավիճակում չեզոքություն լինել չի կարող»։