ԱԹՍ-ների և կիբերհարձակումների աճը սպառնում է Եվրոպայի ավիացիոն անվտանգությանը

Եվրոպայում միաժամանակ արձանագրված կիբերհարձակումները և անօդաչուների ներթափանցումները բացահայտում են տարածաշրջանի ավիացիոն ենթակառուցվածքների խոցելի կողմերը։ Սպասարկման համակարգերի խափանումը Լոնդոնի «Հիթրոու», Բրյուսելի և Բեռլինի օդանավակայաններում համադրվել է Կոպենհագենի ու Օսլոյի օդային տարածքում ԱԹՍ միջադեպերի հետ՝ հանգեցնելով թռիչքների ժամերով դադարեցման ու հարյուրավոր չվերթների ուշացման։

Դանիայի վարչապետ Մետե Ֆրեդերիկսենը միջադեպերը կապել է կասկածելի ռուսական անօդաչուների գործողությունների հետ, սակայն Մոսկվան կտրականապես հերքում է որևէ առնչություն։ Փորձագետները դրանք գնահատում են որպես «հիբրիդային սպառնալիքներ», որոնք նպատակ ունեն փորձարկել Եվրոպայի կարողությունները՝ պաշտպանելու կենսական նշանակության ենթակառուցվածքները։ «Սկզբում ստուգում են մեթոդի արդյունավետությունը, հետո՝ մեր արձագանքը», — նշել է Հիբրիդային սպառնալիքների դեմ պայքարի եվրոպական կենտրոնի ներկայացուցիչ Յուքկա Սավոլայնեն։

Մասնագետների խոսքով՝ ավիացիոն ոլորտի բարձր փոխկապակցվածությունը այն դարձնում է խիստ խոցելի։ Դեռևս թանկարժեք և դանդաղ ընթացող տեխնոլոգիական արդիականացումը՝ ներառյալ հակաԱԹՍ համակարգերը, խոչընդոտում է արագ արձագանքին։ «Այս միջադեպը ցույց տվեց, թե որքան խոցելի է ավիացիոն ոլորտը թվային աշխարհում», — ընդգծել է ամերիկյան կիբերանվտանգության F5 ընկերության ներկայացուցիչ Բարտ Սալաեթսը։ Օդային փոխադրումների անվտանգության ապահովման նպատակով փորձագետները կոչ են անում կարգավորող մարմիններին խստացնել չափանիշները և ներդնել նոր պաշտպանական միջոցներ, գրում է Reuters-ը։