Լիտվայի նախագահը մեղադրում է ԵՄ-ին՝ Ռուսաստանի ֆինանսական աջակցման մեջ

Լիտվայի նախագահ Գիտանաս Նաուսեդան քննադատել է Եվրոպական միությանը՝ շարունակվող ռուսական էներգառեսուրսների գնումների համար։ Ինչպես փոխանցում է Delfi-ն, նա ընդգծել է, որ նույնիսկ Ուկրաինայում պատերազմական գործողությունների սկսվելուց երեքուկես տարի անց ԵՄ-ն շարունակում է գնել ռուսական գազ և նավթ։

Նաուսեդայի խոսքով՝ այն գումարները, որոնք ԵՄ երկրները ծախսում են ռուսական էներգակիրների ձեռքբերման համար, գերազանցում են Ուկրաինային տրամադրվող օգնության ծավալները։ «Սա նշանակում է, որ Եվրոպան նույնիսկ չեզոք չէ և ֆինանսական առումով ավելի շատ Ռուսաստանի կողմն է, քան Ուկրաինայի։ Մենք, իհարկե, աջակցում ենք Ուկրաինային և կիրառում ենք պատժամիջոցներ, բայց էներգակիրների ներմուծման այս անընդհատությունը պետք է բոլորին հուսախաբ անի», — ասել է նա։

Ավելի վաղ Կրեմլի խոսնակ Դմիտրի Պեսկովը հայտարարել էր, որ ԱՄՆ նախագահ Դոնալդ Տրամփը, տարբեր երկրներին Ռուսաստանի էներգակիրներից հրաժարվելու կոչ անելով, գործում է որպես բիզնեսմեն՝ ապահովելով իր երկրի տնտեսական շահերը։