Մանկության շրջանում թլպատումը կարող է հանգեցնել աուտիզմի․ Քենեդի կրտսեր

Առողջապահության և մարդկային ծառայությունների նախարար Ռոբերտ Քենեդի կրտսերը հայտարարել է, որ թլպատման և աուտիզմի միջև ամուր կապ կա, հաղորդում է New York Post-ը։

«Կան երկու ուսումնասիրություններ, որոնք ցույց են տալիս, որ վաղ թլպատված երեխաների մոտ աուտիզմի մակարդակը կրկնակի բարձր է, և շատ հավանական է, որ նրանց տրվել է Թայլենոլ (պարացետամոլ – խմբ․)», -  կաբինետի նիստի ժամանակ ասել է Քենեդին նախագահ Դոնալդ Թրամփին։

Նախարարը չի նշել, թե որ ուսումնասիրության մասին է խոսքը, սակայն 2015 թվականին դանիական ուսումնասիրությունը, որին մասնակցել է Z սերնդի մոտավորապես 343 000 անդամ, ցույց է տվել, որ թլպատված տղաները ավելի հակված են աուտիզմի մինչև 10 տարեկանը՝ համեմատած իրենց չթլպատված հասակակիցների հետ։ Հետազոտողները ենթադրել են, որ վաղ վիրաբուժական միջամտության ցավն ու սթրեսը կարող են մեծացնել նյարդաբանական, վարքային և հոգեբանական խնդիրների առաջացման ռիսկը կյանքի ուշ շրջանում։