ԵՄ-ն դեռևս որոշում չի կայացրել ռուս գործարարների ակտիվների բռնագրավման վերաբերյալ

Եվրոպական հանձնաժողովը քննարկում է Ռուսաստանի Կենտրոնական բանկի ակտիվների օգտագործման հարցը. ռուս ֆիզիկական կամ իրավաբանական անձանց ակտիվների բռնագրավման մասին խոսք չկա։ Այս մասին, ըստ ՏԱՍՍ-ի, ճեպազրույցի ժամանակ հայտարարել է ԵՄ խոսնակ Բալաժ Ույվարին։

«Մենք քննարկում ենք միայն ինքնիշխան ակտիվների, այսինքն՝ Ռուսաստանի Կենտրոնական բանկի եվրոպական իրավասության տակ գտնվող արգելափակված ակտիվների օգտագործման հարցը։ Սա մեր դիրքորոշումն է։ Եվրոպական հանձնաժողովն առաջարկել է սա, ինչը ներկայումս քննարկվում է», - ասել է Ույվարին՝ պատասխանելով այն հարցին, թե արդյոք ԵՄ-ն քննարկում է ռուս գործարարների ակտիվները բռնագրավելու հնարավորությունը։

Սեպտեմբերին Գերմանիայի կանցլեր Ֆրիդրիխ Մերցը առաջարկել է Ուկրաինային տրամադրել «փոխհատուցման» վարկ, որը ֆինանսավորվում է ռուսական արգելափակված ակտիվներից։ Նա կոչ է արել «օգտագործել արդյունավետ լծակ, որը կխաթարի Ռուսաստանի նախագահի ցինիկ խաղը»։ Այս գաղափարը հետաքրքրություն է առաջացրել Կիևի մոտ՝ չնայած որոշ եվրոպական երկրներ դեմ են եղել դրան։