2025 թվականի սեպտեմբերը աշխարհում եղել է երրորդ ամենատաքը

Ինչպես նշվում է Կլիմայի փոփոխության «Կոպերնիկուս» ծառայության հերթական տեղեկագրում, 2025 թվականի սեպտեմբերը դարձել է աշխարհի երրորդ ամենատաք սեպտեմբերը։ Երկրի մակերևույթի օդի միջին ջերմաստիճանը կազմել է 16.11°C, ինչը 0.66°C-ով բարձր է 1991–2020 թվականների սեպտեմբերի միջին ցուցանիշից։ Փոխանցում է «Հիդրոօդերևութաբանության և մոնիթորինգի կենտրոնը»։

2025 թվականի սեպտեմբերը 0.27°C-ով ցուրտ է եղել դիտարկումների պատմության մեջ ամենատաք՝ 2023 թվականի սեպտեմբերից, և ընդամենը 0.07°C-ով ցուրտ՝ նախորդ տարվա՝ սեպտեմբերից։ 2025 թվականի սեպտեմբերի ջերմաստիճանը 1.47°C-ով բարձր է եղել 1850–1900 թվականների միջին ցուցանիշից, որն օգտագործվում է նախարդյունաբերական մակարդակի սահմանման համար։

2024 թվականի հոկտեմբերից մինչև 2025 թվականի սեպտեմբեր ընկած 12 ամիսների ընթացքում օդի միջին ջերմաստիճանը 0.63°C-ով բարձր է եղել 1991–2020 թվականների միջին ցուցանիշից և 1.51°C-ով՝ նախարդյունաբերական մակարդակից։

2025 թվականի սեպտեմբերին Եվրոպայի տարածքում օդի միջին ջերմաստիճանը կազմել է 15.95°C, ինչը 1.23°C-ով բարձր է 1991–2020 թվականների սեպտեմբերյան միջինից։ Այս ցուցանիշով 2025 թվականի սեպտեմբերը հինգերորդ տեղում է գտնվում Եվրոպայի ամենատաք սեպտեմբերների շարքում։

Օդի միջինից բարձր ջերմաստիճանները առավել ընդգծված են եղել Ֆենոսկանդիայի (Սկանդինավյան թերակղզի և Ֆինլանդիա) և Արևելյան Եվրոպայի տարածքում։ Միջինից ցածր ջերմաստիճաններ գրանցվել են միայն Արևմտյան Եվրոպայի որոշ շրջաններում, և, որպես կանոն, օդի ջերմաստիճանը այդ շրջաններում եղել է մինչև 1°C-ով ցածր բազմամյա միջին ցուցանիշների համեմատ։

Եվրոպայից դուրս միջինից բարձր ջերմաստիճաններ նկատվել են Կանադայում, Գրենլանդիայի որոշ հատվածներում, Սիբիրի հյուսիս-արևմուտքում և մերձափնյա շրջաններում, ինչպես նաև Անտարկտիդայի զգալի մասում։

Աշխարհի միակ խոշոր շրջանները, որտեղ նկատվել են արտահայտված բացասական ջերմաստիճանային շեղումներ, եղել են Կենտրոնական Սիբիրի հյուսիսը, Արևմտյան Ավստրալիան և Արևելյան Անտարկտիդայի որոշ հատվածներ։

2025 թվականի սեպտեմբերին ծովի մակերևույթի միջին ջերմաստիճանը՝ 60° հարավային և 60° հյուսիսային լայնությունների միջև, կազմել է 20.72°C։ Սա տվյալ ամսվա համար երրորդ ամենաբարձր ցուցանիշն է դիտարկումների պատմության մեջ և 0.20°C-ով ցածր է 2023 թվականի սեպտեմբերի ռեկորդային ցուցանիշից։

Եվրոպայում՝ Նորվեգական ծովից մինչև Կարսկի ծով ձգվող լայն տարածքում, մթնոլորտային տեղումները եղել են միջինից զգալիորեն բարձր մինչև ռեկորդային ցուցանիշներ։ Միջերկրական ծովում տեղումները հիմնականում եղել են շատ ավելի բարձր, հատկապես ավազանի արևմտյան և կենտրոնական հատվածներում։