Թրամփը անձնական երաշխիք է տվել՝ Իսրայելը չի վերսկսի պատերազմը Գազայում

Ամերիկյան Axios պարբերականի տվյալներով՝ ԱՄՆ նախագահ Դոնալդ Թրամփը անձամբ երաշխավորել է, որ Իսրայելը չի վերսկսի ռազմական գործողությունները Գազայի հատվածում այն բանից հետո, երբ կնքվի խաղաղ համաձայնագիրը ՀԱՄԱՍ-ի հետ։ Ներկայացվում է, որ խոսքը ոչ միայն քաղաքական հայտարարության, այլև գործնական հանձնառության մասին է, որի նպատակն է կանխել հակամարտության նոր փուլը։

Axios-ի աղբյուրները հաղորդում են, որ համաձայնագրի պահպանման համար նախատեսվում է ԱՄՆ ղեկավարությամբ ստեղծել հատուկ ռազմական օպերատիվ խումբ, որը պետք է վերահսկի հրադադարի ընթացքը և արձագանքի ցանկացած խախտման։ Հրապարակման համաձայն՝ հենց Թրամփի անձնական երաշխիքներն են դարձել այն առանցքային հանգամանքը, որը համոզել է ՀԱՄԱՍ-ին ընդունել ներկայացված պայմանները։

Ավելի վաղ Թրամփը հայտնել էր, որ Իսրայելի և ՀԱՄԱՍ-ի ներկայացուցիչները ստորագրել են իր նախաձեռնած խաղաղության պլանի առաջին փուլը, որը ներառում է իսրայելական զորքերի դուրսբերում համաձայնեցված դիրքերից և Գազայում պահվող պատանդների ազատ արձակում։