Ամերիկյան փորձագետները ճանաչել են․ ռուսական Ս-300 համակարգերը կարող են հայտնաբերել F-35 կործանիչները

Ամերիկյան The National Interest (TNI) պարբերականը հրապարակել է հոդված, որտեղ նշվում է, որ նորացված ռուսական Ս-300 հակաօդային պաշտպանության համակարգերը կարող են հայտնաբերել ամերիկյան հինգերորդ սերնդի F-35 կործանիչները։ Հոդվածի հեղինակ, վերլուծաբան Բրենդոն Վայհերթը նշել է, որ Ռուսաստանը, ամենայն հավանականությամբ, կատարելագործել է Վենեսուելային փոխանցված Ս-300ՎՄ համակարգերը՝ ստեղծելով ինտեգրված հակաօդային պաշտպանական ցանց, որը միավորում է տարբեր տեսակի ռադարներ և թույլ է տալիս հայտնաբերել նույնիսկ թաքնված թռչող սարքեր։

Վայհերթի տեղեկացմամբ՝ Վենեսուելայի զինանոցում գործող Ս-300ՎՄ, «Պեչորա-2Մ» և Պ-18 «Տերեկ» համակարգերը արդեն աշխատում են միասնական ցանցում՝ 30-ից 300 մեգահերց հաճախականության միջակայքում։ Այդ ինտեգրացիան հնարավորություն է տալիս միավորել տարբեր աղբյուրներից ստացված տվյալները և ձևավորել ընդհանուր պատկեր օդային տարածքի մասին, ինչն էլ նվազեցնում է F-35-ի անտեսանելիության առավելությունը։

Միևնույն ժամանակ, ամերիկացի փորձագետը շեշտել է, որ թաքնված թռչող սարքի հայտնաբերումն այս դեպքում մնում է հավանականության մակարդակի վրա և չի երաշխավորում նրա ոչնչացումը։ F-35-ը հագեցած է ռադիոէլեկտրոնային պայքարի համակարգերով, որոնք թույլ են տալիս խուսափել հրթիռային հարվածներից։ Բացի այդ, հայտնաբերման արդյունավետությունը կախված է կործանիչի թռիչքի բարձրությունից և եղանակային պայմաններից։ Վայհերթը եզրափակել է, որ Վաշինգտոնը չպետք է թերագնահատի Վենեսուելայի պաշտպանական ներուժը՝ նշելով, որ Մոսկվայի տրամադրած տեխնոլոգիաները կարող են լուրջ խոչընդոտ դառնալ ԱՄՆ-ի ռազմական ծրագրերի իրականացման համար։