ԵՄ-ը պատրաստվում է խստացնել վիզային քաղաքականությունը երրորդ երկրների նկատմամբ

Եվրամիությունը պատրաստում է ավելի խիստ վիզային կանոններ երրորդ երկրների քաղաքացիների համար, հաղորդում է Euractiv-ը՝ հղում անելով Եվրահանձնաժողովի նախագծին։

Ըստ աղբյուրի՝ նախաձեռնությունը նպատակ ունի բարձրացնել մուտքի վերահսկողությունը, ինչպես նաև սահմանել ավելի խիստ պայմաններ այն երկրների նկատմամբ, որոնք չեն համագործակցում միգրացիոն կամ անվտանգային հարցերում։ Նախագծի քննարկումը նախատեսվում է առաջիկա շաբաթներին՝ անդամ երկրների ներքին գործերի նախարարների մակարդակով։

Այս նախաձեռնությունը դիտարկվում է որպես պատասխան աճող միգրացիոն ճնշմանը և ապօրինի մուտքերի ավելացմանը դեպի ԵՄ տարածք։ Նոր կանոնների ընդունման դեպքում երրորդ երկրների քաղաքացիների համար վիզա ստանալու գործընթացը կարող է դառնալ ավելի երկարատև և պահանջկոտ։