Եվրոպական խորհրդարանը կքննարկի ռուսական գազի և նավթի ներմուծման արգելքի նախաձեռնությունը

Հոկտեմբերի 16-ին Եվրոպական խորհրդարանի արդյունաբերության և էներգետիկայի կոմիտեն քվեարկելու է Եվրահանձնաժողովի առաջարկած էներգետիկ բարեփոխումների փաթեթի վերաբերյալ։ Եթե փոփոխությունները ստանան աջակցություն, ԵՄ օրենսդրության մեջ կներառվի ռուսական գազի, նավթի և նավթամթերքի գնումների արգելք։

Նախագծով նախատեսվում է 2025 թվականի ավարտից դադարեցնել Ռուսաստանի հետ նոր գազային պայմանագրերի կնքումը։ Գործող կարճաժամկետ պայմանագրերը կարող են գործել մինչև 2026 թվականի հունիս, իսկ երկարաժամկետները՝ մինչև 2027 թվականի սկիզբը։ Նավթի և նավթամթերքի ներմուծման ամբողջական արգելքը նախատեսվում է ուժի մեջ մտնել 2026 թվականից։

Կոմիտեի հավանության դեպքում նախաձեռնությունը պետք է հաստատեն նաև Եվրոպական խորհրդարանը, Եվրամիության խորհուրդը և Եվրահանձնաժողովը։ Բրյուսելում ընդգծում են, որ այս սահմանափակումները տարբերվում են դասական պատժամիջոցներից՝ ունենալով երկարաժամկետ ազդեցություն և չեղարկման ենթակա չլինելով անգամ Ուկրաինայի հակամարտության ավարտից հետո։