Մեծ Բրիտանիան կտրուկ ընդլայնել է հակառուսական պատժամիջոցների ցուցակը

Մեծ Բրիտանիան հայտարարել է Ռուսաստանի դեմ նոր պատժամիջոցների փաթեթի մասին՝ ավելացնելով ցուցակը ևս 90 սուբյեկտով և ընկերությամբ, հաղորդում է ТАСС-ը։ Սև ցուցակում ներառվել են ՌԴ ազգային վճարային համակարգը (ՆՍՊԿ)՝ «Միր» քարտերի օպերատորը, մի շարք ռուսական բանկեր, ընկերություններ, ինչպես նաև 51 նավ, որոնք Լոնդոնի գնահատմամբ կապ ունեն Ռուսաստանի հետ։

Բացի այդ, սահմանափակումների տակ են ընկել «Լուկոյլ» նավթային հսկան, չինական China Merchants Bank-ը և մի շարք միկրոէլեկտրոնիկայի մատակարարներ Չինաստանից ու Թուրքիայից։ Սա Մեծ Բրիտանիայի կողմից ռուսական ֆինանսական և տեխնոլոգիական համակարգերի նկատմամբ ամենալայն հարվածներից մեկն է վերջին ամիսներին։

Նշենք, որ ՆՍՊԿ-ն, որը ստեղծվել է 2014 թվականին՝ արևմտյան սանկցիաներից հետո, արդեն գտնվում է ԱՄՆ-ի պատժամիջոցների տակ 2024 թվականի փետրվարից։ Նախորդ ամիս Եվրամիությունը նույնպես հայտարարել էր «Միր» համակարգի նկատմամբ սահմանափակումներ մտցնելու մտադրության մասին՝ 19-րդ պատժամիջոցային փաթեթի շրջանակում։