Ես գիտեմ՝ բոլորդ գնալու եք տուն, իսկ ես չեմ գնալու տուն, բոլորիդ հաջողություն եմ մաղթում. Մկրտիչ Սրբազանը՝ դատարանում

«Արհեստական մեղադրանք էր՝ արհեստական ծանր հոդվածներով, որպեսզի կարողանային կալանքի որոշում կայացնել»,- դատարանի կողմից Արագածոտնի թեմի առաջնորդ Մկրտիչ եպիսկոպոս Պռոշյանին  երկու ամսով կալանավորվելու որոշման հրապարակումից հետո լրագրողներին ասաց պաշտպաններից Արա Զոհրաբյանը։

Նա նշեց, որ 2 հոդված են մեղսագրում Մկրտիչ եպիսկոպոս Սրբազանին․ «Երկու հոդվածներում էլ նման ձևակերպում է  օգտագործվում՝  այդ արարքը, եթե կատարվել է իշխանական կամ ծառայողական լիազորություններն օգտագործելով։

Իշխանական կամ ծառայողական  լիազորություններ օգտագործելը չի վերաբերում մասնավոր անձանց։ Սա վերաբերվում է  պետական կամ ՏԻՄ  պաշտոնատար անձանց։ Այսինքն, այս հոդվածները, այդ մասերն ընդհանրապես վերաբերելի չեն։ Ավելին, նախաքննության մարմինը, մեղադրանքի կողմը  չկարողացավ այդ մասով հիմնավոր փաստարկներ բերել»։

Նա նշեց, որ հարկադրանքի փաստ էլ չկա. «Նույնիսկ Տեր Արամի ցուցմունքներում չկա, որ իրեն հարկադրել են։ Այս տեսակետից հանցագործություն չկա ընդհանրապես։ Մյուս մասով էլ ասում է՝ 2021-ին քարոզչության վրա եք ազդել, «ժողով եք արել, ասել եք՝ ում ուզում եք ընտրեք, Փաշինյանին չընտրեք»։ Դա քարոզչություն է, Ընտրական օրենսգիրքը սահմանում է, թե ինչ է քարոզչությունը՝ որևէ թեկնածուի օգտին քվեարկել կամ քվերակությունից զերծ մնալու համոզմունք է։ Պայմանականորեն ընդունենք՝ եղել են այդ բառերը, կոչվում է  քարոզչություն, չի կոչվում հանցագործություն, հանցագործության որևէ հատկանիշ չունենք։

Հիմնավոր կասկած չկա, դրան գումարած՝  կալանավորման նպատակն էլ չկա, թե ինչու է  կալանավորվել»։

Նա նաև   հրապարակեց Մկրտիչ Սրբազանի վերջին խոսքը դատարանում. «Նախ շնորհակալություն հայտնեց, հետո ասաց՝ դուք բոլորդ գիտեք, թե ինչ եք անելու։ Ասաց՝ ես լավատես չեմ, ես գիտեմ՝  բոլորդ գնալու եք տուն, իսկ ես չեմ գնալու տուն, բոլորիդ հաջողություն եմ մաղթում, անփորձանք գնաք ու հասնեք ձեր տները։