Հասարակությունների բևեռացումը և քաղաքականացումը խաթարում են մարդու իրավունքների ընկալումը և ձևախեղում ամբողջ համակարգը. ՄԻՊ

ՄԻՊ գրասենյակից տեղեկացնում են, որ Մալթայի Հանրապետությունում աշխատանքային այցով գտնվող Մարդու իրավունքների պաշտպան Անահիտ Մանասյանը հոկտեմբերի 15-ին, որպես բանախոս մասնակցել է «Մարդու իրավունքների պաշտպանը՝ որպես ժողովրդավարության հենասյուն փոփոխությունների ժամանակներում» խորագրով պանելային քննարկմանը։

 

Միջոցառումը տեղի է ունեցել Մալթայի օմբուդսմանական հաստատության հիմնադրման 30-ամյակին նվիրված` «Պաշտպանելով լավ կառավարումը դժվար ժամանակներում. Օմբուդսմանի դերը» թեմայով բարձր մակարդակի համաժողովի շրջանակում:

 

Պանելային քննարկմանը մասնակցել են մի շարք երկրների օմբուդսմաններ, իրավաբանական և ակադեմիական համայնքի ներկայացուցիչներ, այդ թվում՝ Հյուսիսային Իռլանդիայի օմբուդսման Մարգարետ Քելլին, Թուրքիայի Հանրապետության գլխավոր օմբուդսման Մեհմեթ Ակարջան, Եվրոպայի խորհրդի Վենետիկի հանձնաժողովի անդամ Մայքլ Ֆրենդոն, Մալթայի համալսարանի գիտնական Անն Մարի Թեյքը։

 

Իր ելույթում Պաշտպանը կարևորել է ժողովրդավարական զարգացումների համատեքստում օմբուդսմանի դերի ամրապնդման անհրաժեշտությունը՝ հատկապես փոփոխությունների այս ժամանակաշրջանում։

«Հասարակությունների բևեռացումը և քաղաքականացումը խաթարում են մարդու իրավունքների ընկալումը և ձևախեղում մարդու իրավունքների պաշտպանության ամբողջ համակարգը: Այս ամենը հանգեցրել է այնպիսի իրավիճակի, երբ բազմաթիվ խնդիրներ են առկա ինչպես քաղաքական ու հանրային գործիչների, այնպես էլ մարդու իրավունքների համատեքստում դերակատարություն ունեցող մասնագիտական համայնքների կողմից իրավունքներին առնչվող էթիկական չափանիշների պահպանման տեսանկյունից»,- նշել է Անահիտ Մանասյանը։

 

Պաշտպանն ընդգծել է, որ եթե մեծ քաղաքական խմբերն ունեն իրենց ձայնը լսելի դարձնելու բազմաթիվ քաղաքական գործիքներ, նույնը չի կարելի ասել խոցելի վիճակում գտնվող անձանց և խմբերի ձայնը լսելի դարձնելու հնարավորությունների մասին:

 

Անահիտ Մանասյանն ընդգծել է վերջիններիս ձայնը լսելի դարձնելուն ուղղված շարունակական քայլերի անհրաժեշտությունը, մարդու իրավունքների ոլորտում գործող բոլոր դերակատարների միջև համերաշխության ու սոլիդարության խթանման, ինչպես նաև բարձր պրոֆեսիոնալիզմի և էթիկական սկզբունքների պահպանման կարևորությունը՝ մարդու իրավունքների պաշտպանության և խթանման արդյունավետությունն ապահովելու նպատակով։

 

Ամփոփելով` նա ընդգծել է, որ մարդու իրավունքների պատշաճ պաշտպանությունն ու խթանումն անհնար են առանց մարդու իրավունքների ոլորտում դերակատարություն ունեցող բոլոր դերակատարների սոլիդարության: Անահիտ Մանասյանը շեշտել է նաև միջազգային համագործակցության կարևորությունը՝ որպես մարդու իրավունքների պաշտպանության արդյունավետության կարևոր բաղադրիչ։

 

Քննարկման շրջանակում ներկայացվել է նաև Հայաստանի Մարդու իրավունքների պաշտպանի գործունեության շրջանակը, առկա իրավական գործիքակազմը, ինչպես նաև առաջնահերթությունները։

 

Հավելենք, որ Վալետտայում՝ Նախագահական նստավայրում, Անահիտ Մանասյանը մասնակցել է Մալթայի Հանրապետության նախագահ Միրիամ Սպիտերի Դեբոնոյի անունից՝ ի պատիվ Մալթայի օմբուդսմանական հաստատության հիմնադրման 30-ամյակին նվիրված բարձր մակարդակի համաժողովի մասնակիցների տրված պաշտոնական ընդունելությանը: