Վենետիկի հանձնաժողովը արձանագրել է՝ ՀՀ քրեական օրենսգրքի 236-րդ հոդվածի 2-րդ մասի ձևակերպումն իրավաչափ չէ․ Մինասյան

Քրեական օրենսգրքի 236-րդ հոդվածի 2-րդ մասի անհստակությունը օգտագործվել է քաղաքական իշխանության կողմից՝ պատվեր իջեցնելու իրավապահ մարմիններին, որ հարուցվեն և իրականացվեն բազմաթիվ քրեական հետապնդումներ։ Այս մասին լրագրողների հետ զրույցում ասել է ՀՅԴ ԳՄ անդամ, «Հայաստան» խմբակցության պատգամավոր Արծվիկ Մինասյանը։ 

Նա նշել է, որ դեռևս 2024 թվականին ԱԺ առնվազն 1/5-ը դիմում էր ներկայացրել ՍԴ 236-րդ հոդվածի 2-րդ մասի անօրինական լինելու վերաբերյալ, սակայն այն կասեցվել էր։ Դրանից հետո դիմել էին Վենետիկի հանձնաժողովին՝ խորհրդատվական կարծիք ստանալու համար։  Սակայն, Վենետիկի հանձնաժողովը արձանագրել է՝ ՀՀ քրեական օրենսգրքի 236-րդ հոդվածի 2-րդ մասի ձևակերպումն իրավաչափ չէ: 

«Վերջերս ստացվել է Վենետիկի հանձնաժողովի խորհրդատվական կարծիքը, որով վերահաստատվել է դիմումատուների, իրավապաշտպանների այն տեսակետը, որ չի կարող ՀՀ քրեական օրենսգրքի՝  հավաքների կազմակերպման, անցկացման, նյութական շահագրգռվածության առկա ձևակերպումը լինել իրավաչափ, ավելին՝ այն իր իրավական որոշակիության տեսակետից անհստակության բարձր աստիճանով օգտագործվել է քաղաքական իշխանության կողմից՝ պատվեր իջեցնելու իրավապահ մարմիններին, որ հարուցվեն և իրականացվեն բազմաթիվ քրեական հետապնդումներ։ Դրանով անցնում են թե՛ քաղաքական կուսակցություններ, թե՛ շարժումներ, թե՛ անձինք՝ անհատներ։ Բազմաթիվ են դեպքերը, երբ իրավապահ մարմինները, անտեսելով մարդու հիմնարար իրավունքը, ազատությունները՝ պայմանավորված հավաքների անցկացման մասով՝ կիրառել են սխալ կերպով և անազատության մեջ են պահել անձանց»,- ասաց Մինասյանը