Ադրբեջանցի պատգամավորը հայտարարել է, թե, իբր, Հայաստանի տարածքը «պատկանում է Ադրբեջանին»․ ԶԼՄ

Ադրբեջանի Միլլի Մեջլիսի (խորհրդարան) իշխող «Յենի Ազերբայջան» կուսակցությունից պատգամավոր Հիքմեթ Բաբաօղլուն սադրիչ հայտարարություն է արել։ Modern.az-ին տված հարցազրույցում նա պնդել է, թե Հայաստանի տարածքը, իբր, պատկանում է Ադրբեջանին, հաղորդում է caucasus-chronicle–ը։

«Հայաստանը իմ հայրենիքն է։ Սա այն վայրն է, որտեղ ես ծնվել, մեծացել, սովորել եմ և որը եղել է իմ տունը։ Այն փաստը, որ երկիրը կոչվում է Հայաստան, չի փոխում իրականությունը. այս աշխարհագրական տարածքը պատկանում է մեզ։

Ես հիշողություններ ունեմ, որոնք կապված են Հայաստանի Ամասիա շրջանի (նկատի ունի՝ Շիրակի մարզը - խմբ.) յուրաքանչյուր սանտիմետրի հետ։ Ես ուզում եմ ֆիզիկապես վերամիավորվել այդ հիշողությունների հետ, կրկին տեսնել մեր նախնիների կողմից մեզ թողնված մեծ նյութական և մշակութային ժառանգությունը։ Հետևաբար, ես ուրախությամբ կմեկնեմ Հայաստան։

Այնուամենայնիվ, երբ խոսքը գնում է մեր պատմական հողերում այսօր ապրող ժողովրդի ներկայացուցիչների հետ հարաբերությունների մասին, ինչպես նշել է մեր նախագահը, մենք կարող ենք կառուցել ցանկացած տնտեսական և առևտրային կապեր, բայց երբեք չպետք է մոռանանք հայերի կողմից ադրբեջանցի ժողովրդի դեմ կատարված հանցագործությունների մասին», - հայտարարել է ադրբեջանցի խորհրդարանականը։