Հովհաննավանքում կիրակի օրը պատարագը մատուցելու եմ ես, տեսնենք՝ ինչ կլինի. Տեր Սարգիս

Հովհաննավանքում պսակադրության արարողություն է եղել, մտել եմ եկեղեցի, իմ աղոթքն արել, դուրս եմ եկել։ Զույգի հետ խոսեցի, բայց իրենք նախընտրել էին, որ պսակադրությունն անի այստեղի նախկին քահանան (Տեր Արամը – խմբ․), չեմ խոչընդոտել, որևէ բանով չեմ խանգարել իրենց, դա իրենց որոշումն էր: Մենք իրենց նախապես զգուշացնում ենք, ասում ենք, բացատրում ենք, ընտրությունն իրենցն է։ Այս մասին լրագրողների հետ զրույցում ասել է Տեր Սարգիս քահանա Սարգսյանը։

Անդրադառնալով երեկ եկեղեցու բակում տեղի ունեցած միջադեպին՝ նա նշել է, որ համայնքի անդամ ներկայացած անձինք եկել ու պահանջում էին, որ ինքը հեռանա։

«Նրանք ներկայանում էին որպես համայնքի անդամներ և ինձ ասացին, որ այլևս չեն ուզում տեսնել իմ ծառայությունն այստեղ: Ես էլ պատասխանել եմ, որ իմ ծառայությունը այստեղ նշանակված է թեմակալ առաջնորդի կողմից: Մեր եկեղեցին որևէ ընդհարումներ չի ուզում: Մենք ուզում ենք ամեն ինչ խաղաղ ճանապարհով լուծվի և ամեն ինչ իր տեղն ընկնի»,– ասաց նա՝ հստակեցնելով, որ սպառնալիքներ, այնուամենայնիվ, իր հասցեին չի հնչել:

Հարցին, թե Մայր Աթոռն իրեն միայնակ չի թողել, Տեր Սարգիսը, ի պատասխան, վստահեցրել է, որ ինքը Եկեղեցու և հավատացյալների պաշտպանության տակ է․ «Քահանաներն են իրենց հավատացյալ հարազատներին հորդորում, որ այս պահին չգան, իրենց կողքը չլինեն, որպեսզի դրանից ընդհարումներ չլինեն: Այսինքն, նույնիսկ այդ հոսքն է կանխվում մեր կողմից, որպեսզի նման խնդիրներ չլինեն»:

Հոգևորականը նաև նշել է, որ այս կիրակի պատարագն ինքն է մատուցելու, քանի որ Տեր Արամը կարգալույծ է հռչակվել․ «Ըստ եկեղեցական կարգի՝ պատարագը պիտի մատուցեմ ես։ Մինչև կիրակի կտեսնենք՝ ինչ կլնի»։

Նա նաև հաստատեց, որ իրեն հրավիրել են Քննչական կոմիտե։