Մեսսին պատմական ռեկորդ է սահմանել

Ամերիկյան «Ինտեր Մայամի» ակումբի արգենտինացի հարձակվող Լիոնել Մեսսին սահմանել է MLS-ի ռեկորդ մեկ օրացուցային տարվա ընթացքում խփած գոլերի քանակով։

Հոկտեմբերի 25-ի գիշերը «Ինտեր Մայամին» MLS-ի փլեյ-օֆֆի առաջին փուլի առաջին խաղում 3-1 հաշվով հաղթեց «Նեշվիլին», որտեղ Մեսսին խփեց երկու գոլ։ Արգենտինացի հարձակվողն այժմ 39 գոլ ունի «Ինտեր Մայամիի» կազմում 2025 թվականին՝ սահմանելով MLS-ի նոր ռեկորդ մեկ օրացուցային տարվա ընթացքում խփած գոլերի քանակով։ Նախկինում ռեկորդը պատկանում էր Դենիս Բուանգային (38 գոլ 2023 թվականին) և Կառլոս Վելային (38 գոլ 2019 թվականին)։

«Ինտեր Մայամիի» և «Նեշվիլի» միջև երկրորդ խաղը տեղի կունենա նոյեմբերի 2-ին և կմեկնարկի Երևանի ժամանակով՝ 02:30-ին։