Եթե Վազգենը կենդանի լիներ, նման բան չէր կարող լինել Ղարաբաղի հետ կապված․ Սասուն Միքայելյան

«Երկրապահն» էլի կմնա սահմաններում, մինչև մեր բանակը հզորանա, մենք միշտ եղել ենք մեր բանակի, զինվորի կողքին և այսօր էլ ենք լինելու, լրագրողների հետ զրույցում ասաց ԵԿՄ նախագահ Սասուն Միքայելյանը՝ արձագանքելով հարցին, թե ինչպես է վերաբերվում զինվորական ծառայության ժամկետը կրճատելու մասին կառավարության որոշմանը։

«Ընդհանուր չեմ կարող գնահատական տալ, թե որն է ճիշտ, որը՝ սխալ։ Ժողովրդի մեծամասնությունը կողմ է, մարդիկ կան՝ դեմ են։ Պետք է առողջ երեխաներ զորակոչվեն բանակ, որպեսզի պրոֆեսիոնալ բանակ ունենանք։ Այսօր, ցավոք, մեր երիտասարդությունը հիվանդ է, մեծամասնությունն ազատվում է ծառայությունից։ Պրոֆեսիոնալ բանակը կկայանա թե՛ 1.5 տարվա, թե 2 տարվա դեպքում էլ։ Հիմնականում զորահավաքներ կլինեն, մարդիկ դիրքերում ծառայություն կտանեն։ Դա արվում է այսօր բանակի կողմից և շատ ողջունելի է։

Չեմ կարծում, թե թվակազմի կրճատումը վտանգ կառաջացնի, ավելի լավ է մարտունակ զինվոր ունենանք, քան՝ թիվ լինի։ Որակ է պետք։ Համոզված եմ, որ մեր բանակը գնում է որակի վրա»,-ասաց Սասուն Միքայելյանը։

Նրա խոսքով՝ հոկտեմբերի 27-ի ոճրագործությունը պետք է բացահայտվի՝ «հատկապես, որ այսօր արտաքին քաղաքական կուրս է փոխվել»։

Միքայելյանի կարծիքով՝ այդ օրը ոչ թե Կառավարության ղեկավարությունը գլխատվեց, այլ խարխլվեց պետականությունը և երկիրը 50 տարի հետ գնաց:

«Բնականաբար, Վազգենին պիտի արենայից հանեին արտաքին ուժերը՝ ներքին ուժերի ձեռքով: Եթե Վազգենը կենդանի լիներ, նման բան չէր կարող լինել Ղարաբաղի հետ կապված: Քաղաքականությունը միշտ հեռանկարային է: Այս տարիների ընթացքում կամաց-կամաց նախորդ իշխանություններն էլ եկան ալան-թալանով զբաղվեցին և երկիրը այս վիճակում հայտնվեց, կորցրինք Արցախը»,-ասաց նա։