Հոկտեմբերի 27-ը պետք է բացահայտվի․ կան մարդիկ, որոնք Հայաստանում չեն, փախած են․ Անդրանիկ Քոչարյան

Հոկտեմբերի 27-ը պետք է բացահայտվի, որպեսզի էդ էջը փակվի։ Էջը փակվել չի նշանակում մոռանալ, թե ինչի միջով անցավ մեր երկիրը հոկտեմբերի 27-ից հետո, լրագրողների հետ զրույցում ասաց ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։

Նրա կարծիքով՝ դեռ հնարավորություն կա հասնելու հոկտեմբերի 27-ի ոճրագործության լիարժեք բացահայտման․ «Լիահույս եմ, որ այս տարի թեկուզ փոքր, բայց կտեսնենք բացահայտման գոնե հնարավորություն, ինչը հնարավորություն կտա շարժվելու առաջ»,-ասաց Քոչարյանը։

Հարցին, թե ի՞նչն է իրենց այդ հույսը տալիս, Անդրանիկ Քոչարյանը պատասխանեց.

«Կան մարդիկ, որոնք Հայաստանում չեն, փախած են, բայց նրանք մահացած չեն և գոյություն ունեն։ Որտե՞ղ է Ալիկ Հարությունյանը, ամենակարևոր վկաներից մեկը, չկա չէ՞... Փախուստի մեջ է այն դատավորը, որը հնարավորություն տվեց վկաներին չլսելու։ Դա պարոն Ուզունյանն է, որը լքել է Հայաստանը, նրան օր առաջ պետք է տեսնել քննչական մարմինների հարցերին պատասխանելու միջավայրում։ Պետք է հասկանանք՝ ո՞վ հրահանգավորեց, որ կարևոր վկաները դուրս մնան դատաքննական փուլից կամ ընդհանրապես չլսվեն»։