«Իր կարծիքն է արտահայտել». Լատվիայի ԱԳՆ–ն մեկնաբանել է դեսպանի՝ «Զանգեզուրի միջանցքի» վերաբերյալ հայտարարությունը

Հոկտեմբերի 21-ին ադրբեջանական Report.az հրատարակությունը հրապարակել է Ադրբեջանում Լատվիայի դեսպան Էդգարս Սկույայի հետ հարցազրույցը, որում նա հիշատակել է այսպես կոչված՝ «Զանգեզուրի միջանցքը»։

Ի պատասխան՝  հարցազրույցի վերաբերյալ «Хроники Кавказа» լրատվականի հարցման՝ Լատվիայի արտաքին գործերի նախարարությունը պարզաբանել է․

«Լատվիան հարգում է միջազգային համաձայնագրերը և գործընկեր երկրների դիրքորոշումները, և ձգտում է ապահովել պարզություն, ինչպես վիճահարույց տերմինաբանություն օգտագործելիս խուսափում է թյուրըմբռնումներից։

Պաշտոնական հայտարարություններում և իր դիրքորոշումը արտահայտելիս Լատվիան օգտագործում է միջազգայնորեն ճանաչված տերմինաբանություն։ Տարածաշրջանային տրանսպորտային կապի ներկայիս նախագծին և դրան առնչվող հարցերին վերաբերող ցանկացած պաշտոնական հղում հիմնված է Վաշինգտոնի համաձայնագրում («Թրամփի ուղի միջազգային խաղաղության և բարգավաճման համար» - TRIPP) ամրագրված սահմանումների վրա, որը ստորագրվել է Վաշինգտոնում 2025 թվականի օգոստոսի 8-ին։ Այս տերմինաբանությունը արտացոլում է Հայաստանի, Ադրբեջանի և միջազգային գործընկերների ընդհանուր ըմբռնումը։

Report.az-ին տված հարցազրույցում Ադրբեջանում Լատվիայի դեսպան Էդգարս Սկույան արտահայտել է իր կարծիքը և նշել «Զանգեզուրի միջանցքը» որպես իր ընդունող երկրի հանրային դիսկուրսում օգտագործվող տերմիններից մեկը։

Լատվիան աջակցում է Հարավային Կովկասում տարածաշրջանային համագործակցությանը խթանող տրանսպորտային ու առևտրային կապերին և հարգում կողմերի ինքնիշխանությունն ու տարածքային ամբողջականությունը՝ չմիջամտելով նրանց ինքնիշխանությանը։ Մենք ողջունում ենք Հայաստանի և Ադրբեջանի կողմից խաղաղության համաձայնագրի կնքման ուղղությամբ վերջերս ձեռնարկված դրական քայլերը»։