Իրանի դեսպանը հայտարարել է, որ ԱՄՆ-ն պարտություն է կրել Հորմուզի նեղուցում

Թուրքմենստանում Իրանի դեսպան Ալի Մոջթաբա Ռուզբեհանին հայտարարել է, որ ԱՄՆ-ն փաստացի պարտություն է կրել Հորմուզի նեղուցը վերահսկելու փորձերում։ Նրա հոդվածը հրապարակել է ՌԻԱ Նովոստին։

Դիվանագետի խոսքով՝ Հորմուզի նեղուցը կրկին դարձել է համաշխարհային ուշադրության կենտրոնում և այսօր հանդիսանում է ռազմավարական լարվածության առանցքային կետ։

Ռուզբեհանին պնդել է, որ ԱՄՆ-ի նախկին հայտարարությունները Պարսից ծոցի նկատմամբ լիակատար վերահսկողության մասին այլևս չեն համապատասխանում իրականությանը, քանի որ, նրա գնահատմամբ, Իրանը ռազմական և աշխարհաքաղաքական զգալի առավելություն է ձեռք բերել։

Նա նաև նշել է, որ ստեղծված իրավիճակում ամերիկյան բանակը հայտնվել է ռազմավարական փակուղում՝ չկարողանալով ո՛չ նոր գործողություններ սկսել Իրանի դեմ, ո՛չ էլ նահանջել առանց հեղինակության կորստի։ Դեսպանը զգուշացրել է, որ Հորմուզի նեղուցում ցանկացած պատահական միջադեպ կարող է վերածվել երկարատև տարածաշրջանային պատերազմի։

Ավելի վաղ հաղորդվել էր, որ ԱՄՆ նախագահ Դոնալդ Թրամփը քննարկում է Իրանում ռազմական գործողությունների ընդլայնման տարբերակները, այդ թվում՝ Խարգ կղզու հնարավոր գրավումը և ստորգետնյա միջուկային օբյեկտներին հարվածներ հասցնելը։ Ըստ հրապարակումների՝ քննարկվում են նաև Իրանի վերահսկողությունը Հորմուզի նեղուցի նկատմամբ թուլացնելու տարբերակներ։