Իրանում հարսանիքի ժամանակ 4 մարդու կյանք խլած հարվածը, ամենայն հավանականությամբ, հասցվել է ամերիկյան զինամթերքով․ Reuters

Իրանի հարավում՝ Կուհեստակ քաղաքում, հարսանեկան արարողության ժամանակ տեղի ունեցած պայթյունը, որի հետևանքով զոհվել է 4, վիրավորվել՝ առնվազն 68 մարդ, ամենայն հավանականությամբ, եղել է ամերիկյան զինամթերքի ուղիղ հարվածի հետևանք։ Այս եզրակացությանն են եկել Reuters-ի կողմից ներգրավված ռազմական փորձագետները՝ ուսումնասիրելով գործակալության ստուգած լուսանկարներն ու տեսանյութերը։

Փորձագետների գնահատմամբ՝ զինամթերքը պայթել է տան տանիքին հարվածելու պահին կամ անմիջապես դրա վերևում։ Նրանցից երեքը հավանական են համարել, որ կիրառվել է ամերիկյան զինամթերք, այլ ոչ թե Իրանի ՀՕՊ-ի շեղված հրթիռ։ Փորձագետներից մեկը նշել է, որ ամերիկյան զինամթերքը կարող էր պարզապես վրիպել նախատեսված թիրախից։

ԱՄՆ երկու պաշտոնյաներ Reuters-ին հաստատել են, որ սեպտեմբերի 1-ին ամերիկյան ուժերը հարվածներ են իրականացրել Կուհեստակի շրջանում, այդ թվում՝ հարսանիքի վայրից մոտ 135 մետր հեռավորության վրա գտնվող հեռահաղորդակցության աշտարակի ուղղությամբ։ ԱՄՆ իշխանությունները դեռ ուսումնասիրում են միջադեպի հանգամանքները։ Փոխնախագահ Ջեյ Դի Վենսը ևս հայտարարել է, որ Վաշինգտոնը հետաքննում է տեղի ունեցածը։

Մարդու իրավունքների հարցերով զբաղվող տեղական կազմակերպությունների տվյալներով՝ զոհերի թվում է եղել նաև 4-ամյա երեխա։ Reuters-ը նշում է, որ միջադեպը կրկին սրել է Իրանում ընթացող պատերազմի ընթացքում խաղաղ բնակչության շրջանում զոհերի վերաբերյալ մտահոգությունները։