Իրանը ներկայացրել է Հորմուզի նեղուցի բացման յոթ պայման

Իրանի և Օմանի միջև Հորմուզի նեղուցով նավարկության հարցերի շուրջ ձեռք բերված պայմանավորվածությունները չեն նշանակում դրա բացում, Tasnim գործակալության հարցազրույցում հայտարարել է իրանական բանակցային խմբին մոտ կանգնած աղբյուրը։

Աղբյուրի խոսքով՝ Իրանը միջնորդների միջոցով ամերիկյան կողմին փոխանցել է Հորմուզի նեղուցի բացման յոթ պայման։ Դրանց բովանդակությունը աղբյուրը չի բացահայտել։ Նրա խոսքով՝ պայմանները հավանության են արժանացել իսլամական հանրապետության բարձրագույն ղեկավարության կողմից, և նեղուցը փակ կմնա մինչև դրանց կատարումը։

Գործակալության զրուցակիցը նաև հայտնել է, որ ինտենսիվ տեխնիկական և դիվանագիտական բանակցություններից հետո Թեհրանն ու Մասկատը օգոստոսի վերջին հասել են վերջնական պայմանավորվածության։ Առաջիկայում նախատեսվում է դրա մասին հայտարարել Պարսից ծոցի երկրների արտաքին գործերի նախարարների ներկայությամբ։

Աղբյուրն ընդգծել է, որ համաձայնագիրը կնքվել է բացառապես Իրանի և Օմանի միջև։ Տարածաշրջանի մյուս երկրները, ինչպես նաև Իրաքը, առաջիկա հանդիպմանը ներկա կլինեն միայն համաձայնեցված երթուղիներին և տարանցման պայմաններին ծանոթանալու համար։

Ձեռք բերված պայմանավորվածությունների համաձայն՝ սահմանվել են Պարսից ծոց մուտք գործելու և այնտեղից դուրս գալու նոր երթուղիներ Հորմուզի նեղուցով։ Մուտքի երթուղին ամբողջությամբ կանցնի Իրանի տարածքային ջրերով, ելքի երթուղու մի մասը նույնպես կլինի իրանական ջրերում։

Այս երթուղիներով տարանցումը կիրականացվի Իրանի կողմից սահմանված արձանագրություններին համապատասխան։ Պայմանավորվածության իրականացման դեպքում հարավային երթուղին, որի բացմանը նախկինում ձգտում էր ԱՄՆ-ը, և որը դարձել էր լարվածության հիմնական աղբյուրներից մեկը, կփակվի։

Միևնույն ժամանակ, աղբյուրը հատուկ ընդգծել է, որ Օմանի հետ ձեռք բերված պայմանավորվածությունը չի նշանակում Հորմուզի նեղուցի բացում։ Նրա խոսքով՝ Իրանը միջնորդների միջոցով ամերիկյան կողմին փոխանցել է նավարկության վերսկսման յոթ պայման։ Այս պայմանները հավանության են արժանացել իսլամական հանրապետության բարձրագույն ղեկավարության կողմից, և նեղուցը փակ կմնա մինչև դրանց կատարումը։

Այսպիսով, Օմանի հետ պայմանավորվածությունները սահմանում են նեղուցի հնարավոր բացման կարգը, սակայն նավարկության վերսկսման մասին որոշումը, աղբյուրի խոսքով, ամբողջությամբ կախված է ԱՄՆ գործողություններից և Թեհրանի առաջ քաշած պայմանների կատարումից։ Իրանում այս համաձայնագիրը դիտարկում են որպես քայլ՝ Հորմուզի նեղուցով անցնող երթուղու նկատմամբ իրենց ինքնիշխանությունն ամրապնդելու ուղղությամբ։