ՆԳՆ-ն նոր մոդել է ներդնում․ ոստիկանության և փրկարար ծառայության կադրերի համար կարիերայի նոր ուղի

ՆԳ նախարարությունը շրջանառության մեջ է դրել «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին» օրենքի և հարակից օրենքների նախագծերի փաթեթը։ Նախատեսվում է ոստիկանության և փրկարար ծառայության համար մասնագիտական կադրերի պատրաստման և կարիերային առաջխաղացման նոր մոդել ներդնել։

Նախարարության փոխանցմամբ՝ գործող կարգավորումների պայմաններում դպրոցն ավարտող և ոստիկանության կամ փրկարար ծառայության ոլորտում մասնագիտական կարիերա ընտրել ցանկացող երիտասարդները չեն կարող անմիջապես անցնել այդ ոլորտների համար նախատեսված մասնագիտական կրթական ուղի։ Առաջարկվող փոփոխություններով նախատեսվում է ստեղծել համակարգ, որը հնարավորություն կտա վաղ փուլում բացահայտել և ներգրավել ոլորտով հետաքրքրված ու համապատասխան ներուժ ունեցող երիտասարդներին։

Պետական պատվերի շրջանակում տրամադրվող կրթությունը դիտարկվելու է ոչ միայն որպես կրթական հնարավորություն, այլև որպես հետագա մասնագիտական ծառայության և կարիերայի նախապատրաստական փուլ։ Միջին մասնագիտական կրթական ծրագիրն ավարտած անձինք կնշանակվեն ոստիկանության կամ փրկարար ծառայության միջին խմբի պաշտոններում՝ ՆԳՆ-ում կամ ենթակա պետական մարմիններում առնվազն 10 տարի անընդմեջ ծառայելու պայմանով։

Նախագծով նախատեսվում է նաև մասնագիտական և ծառայողական առաջխաղացման փուլային մեխանիզմ։ Ուսման և անընդմեջ ծառայության ընթացքում պետության առջև ստանձնած պարտավորություններն ամբողջությամբ կատարած անձանց պարտադիր ժամկետային զինվորական ծառայության պարտականությունը կհամարվի իրացված՝ պետությանն ու հասարակությանը երկարաժամկետ ծառայության այլընտրանքային եղանակով։