Բնակարանների գների աճը դանդաղել է. ՌԴ

Ռուսաստանում բնակարանների գների աճի տեմպը 2026 թվականին դանդաղել է։ Տարեսկզբից անշարժ գույքը թանկացել է միջինը 6-7 տոկոսով։ Այս մասին ՏԱՍՍ-ին տված հարցազրույցում հայտնել է Ռուսաստանի ռիելթորների գիլդիայի նախագահ Իրինա Զիրյանովան։

«2026 թվականին գներն աճում են գնաճին համարժեք տեմպերով՝ մոտ 6-7 տոկոսի սահմաններում։ Շատ բան կախված է տարածաշրջանից և անշարժ գույքի շուկայի հատվածից։ Ընդհանուր առմամբ տեսնում ենք գների աճի դանդաղում»,- նշել է Զիրյանովան։

Փորձագետի խոսքով՝ այս միտումը պայմանավորված է մի շարք գործոններով, այդ թվում՝ հիփոթեքային վարկերի բարձր տոկոսադրույքներով։ Նախկինում Ռուսաստանում բնակարանների առուվաճառքի գործարքների 60-80 տոկոսը կատարվում էր հիփոթեքային վարկավորմամբ, մինչդեռ այժմ իրավիճակը փոխվել է։

Զիրյանովան նշել է, որ ոչ բոլոր քաղաքացիներն են կարողանում բնակարանային վարկ ձևակերպել տարեկան 17-18 տոկոսադրույքով կամ օգտվել ընտանեկան հիփոթեքի արտոնյալ պայմաններից։

Ավելի վաղ ՌԴ Պետդումայի շինարարության և բնակարանային-կոմունալ տնտեսության հարցերով հանձնաժողովի փոխնախագահ Ալեքսանդր Ակսենենկոն կանխատեսել էր, որ մինչև 2026 թվականի վերջ շուկայական հիփոթեքային վարկերի տոկոսադրույքները կարող են նվազել մինչև 16-17 տոկոս։