Ամերիկացի ներդրողը մտադիր է Թեղուտի պղնձի խտանյութն արտահանել ԱՄՆ՝ Չինաստանի փոխարեն․ Bloomberg

ԱՄՆ ներդրող Կոնստանտին Սոկոլովը նախատեսում է ընդլայնել ներդրումները Հայաստանի պղնձի արդյունաբերությունում և 2027 թվականից Թեղուտի հանքավայրի արտադրանքն արտահանել ԱՄՆ՝ Չինաստանի փոխարեն։ Այս մասին նա հայտնել է Bloomberg-ին տված հարցազրույցում։

Սոկոլովի ղեկավարած ամերիկյան Dynamic Frontier ներդրումային ընկերությունը, որը սեպտեմբերին ձեռք է բերել Թեղուտի պղնձի հանքավայրը շահագործող ընկերության բաժնեմասը, նախատեսում է արդիականացնել արտադրությունը և ավելացնել ծավալները։ Ներդրողի խոսքով՝ գործարքի հիմնական նպատակներից մեկը Հայաստանի հանքային ռեսուրսները ամերիկյան մատակարարման շղթաներին միացնելն է։

Նրա ծրագրով՝ պղնձի խտանյութի տարեկան արտադրությունը պետք է հասնի 120-130 հազար տոննայի, ինչը համարժեք է շուրջ 26-28 հազար տոննա պղնձի։ Արտադրական նոր հզորությունները նախատեսվում է շահագործման հանձնել 2030 թվականին, իսկ ամբողջական արտադրողականությանը հասնել՝ 2031-ին։ Նշված ծավալը զգալիորեն գերազանցում է հանքավայրի նախկին նախագծային հզորությունը՝ տարեկան մինչև 50 հազար տոննա պղնձի խտանյութ։

Թեղուտի հանքավայրի սեփականատիրոջ փոփոխության մասին հայտնի էր դարձել այս տարվա հուլիսին։ Մինչ այդ հանքավայրի հիմնական բաժնետերն ու վարկատուն Ռուսաստանի պետական «ՎՏԲ» բանկն էր, որը գտնվում է ԱՄՆ պատժամիջոցների ներքո։ Հետաքննող լրագրողների միջազգային կոնսորցիումի՝ ICIJ-ի տվյալներով՝ ԱՄՆ ֆինանսների նախարարության օտարերկրյա ակտիվների վերահսկման վարչությունը՝ OFAC-ը, ամերիկյան ընկերությանը լիցենզիա էր տրամադրել հանքավայրի բաժնետոմսերն ու պարտքային պարտավորությունները ձեռք բերելու համար։

Թեղուտում արդյունաբերական արդյունահանումը սկսվել էր 2014 թվականի դեկտեմբերին, սակայն 2018 թվականի փետրվարին աշխատանքները դադարեցվել էին, ինչի հետևանքով ավելի քան հազար մարդ կորցրել էր աշխատանքը։

Կոնստանտին Սոկոլովը նաև Հայաստանի հեռահաղորդակցության խոշոր օպերատոր «Վիվա Արմենիայի» բաժնետեր է։ Հուլիսին ԱՄՆ պետքարտուղարությունը նրան նշանակել էր ավելի քան 200 միլիոն դոլար արժողությամբ տարածաշրջանային ձեռնարկատիրական հիմնադրամի ղեկավար։ Հիմնադրամը ներդրումներ է կատարում Հարավային Կովկասի և Կենտրոնական Ասիայի տրանսպորտի, էներգետիկայի և կարևոր հանքային ռեսուրսների ոլորտներում։