ԵՄ–ի և Հայաստանի հարաբերություններն առանձնահատուկ դինամիկա են ապրում․ Իտալիայի ԱԳ փոխնախարար

Իտալիայի խորհրդարանի պատգամավորների պալատի Արտաքին հարաբերությունների հանձնաժողովի փոխնախագահ, «Լեգա» կուսակցությունը ներկայացնող Պաոլո Ֆորմենտինին հարցրել է Իտալիայի արտաքին գործերի և միջազգային համագործակցության փոխնախարար Ջորջո Սիլլիին, թե ինչ միջոցներ է պատրաստվում ձեռնարկել Իտալիայի կառավարությունը ստեղծված իրավիճակում՝ խթանելու Հայաստանի և Արևմուտքի հետագա մերձեցումը։

«Եվրամիության և Հայաստանի հարաբերություններն առանձնահատուկ դինամիկա են ապրում։ Մենք բարձր ենք գնահատում Հայաստանի ցանկությունը՝ ամրապնդել համագործակցությունը Բրյուսելի հետ, և կարևոր է խրախուսել Երևանի առաջընթացը այնպիսի հիմնարար ոլորտներում, ինչպիսիք են ժողովրդավարական ինստիտուտների ամրապնդումը, օրենքի գերակայությունը և մարդու իրավունքները:

Առկա համագործակցության գործիքները՝ ԵՄ-Հայաստան Համապարփակ և ընդլայնված գործընկերության համաձայնագիրը և Արևելյան գործընկերության տարածաշրջանային մեխանիզմը, ապահովում են ինստիտուցիոնալ հիմք, որի շրջանակներում կարող են խորացվել երկխոսությունը և համագործակցությունը։

Իտալիան հույս ունի, որ մենք կարող ենք հասնել Բրյուսելի և Երևանի միջև գործընկերության նոր ծրագրի որոշմանը»,- ասել է Իտալիայի ԱԳՆ ղեկավարի տեղակալը։