Սիրիահայերը 2 տարի կկարողանան իրենց անձնական գույքը ՀՀ ներմուծել առանց մաքսազերծման

Մշտական բնակության օտարերկրյա պետությունում քաղաքացիների կյանքին կամ առողջությանը սպառնացող արտակարգ իրավիճակում գտնվող պետություններից, մասնավորապես Սիրիայից, Հայաստան վերադարձող ֆիզիկական անձինք հնարավորություն կունենան առանց մաքսատուրքի վճարման անձնական օգտագործման գույքը ներմուծել ՀՀ 2 տարվա ընթացքում: Այդ մասին որոշման նախագիծն ընդգրկված է ՀՀ կառավարության սեպտեմբերի 18-ի նիստի օրակարգում: «Հաշվի առնելով Սիրիայի ներկայիս պատերազմական իրավիճակը, և քաղաքական հետագա զարգացումները, Սիրայում բնակվող մոտ 100 հազար հայերին սպառնացող վտանգը, Հայաստանի Հանրապետության կառավարությունը միջոցներ է ձեռնարկում մեր հայրենակիցների անվտանգությունն ապահովելու և նրանց վերադարձը Հայրենիք կազմակերպելու համար:

Միաժամանակ Հայրենիք վերադարձող սիրիահայերը հաճախ հնարավորություն չեն ունենում իրենց անձնական օգտագործման գույքը Հայաստան բերել օրենսգրքով սահմանված 180-օրյա ժամկետում և հանդիպում են դրանց մաքսազերծման խնդրին, իսկ մաքսատուրքերի վճարումը ծանր նյութական վիճակում գտնվող սիրիահայերի համար խնդրահարույց է»,- «Արմենպրես»-ի փոխանցմամբ՝ նշված է նախագծի հիմնավորման մեջ:

Սույն նախագծով սահմանվում է մաքսատուրքի գծով արտոնությունից օգտվելու ավելի երկար ժամկետ՝ ինչպես սիրիահայերի,այնպես էլ այն ֆիզիկական անձանց համար, որոնց մշտական բնակության օտարերկրյա պետությունում ստեղծվել է այնպիսի արտակարգ իրավիճակ, որը սպառնում է քաղաքացիների կյանքին կամ առողջությանը: