Չինաստանում «Կալմեջի» թայֆունից շուրջ 6 մլն բնակիչ է տուժել

Չինաստանի հարավի Հայնանի, Գուանդունի նահանգների և Գուանսի-Չժուանի ինքնավար շրջանի առնվազն 5,97 մլն բնակիչներ են տուժել «Կալմեջի» թայֆունի հարվածներից: Ինչպես տեղեկացնում է «Արմենպրես»-ը՝ հղում անելով ՉԺՀ-ի ջրհեղեղների և երաշտի դեմ պայքարի պետական շտաբին, զոհվել է առնվազն 7 մարդ, ևս մեկն անհայտ կորած է համարվում:

Գերատեսչության զեկույցում նշվում է, որ նշված նահանգներում տարերքի հետևանքով հեղեղվել են 668 հազար ցանքատարածություններ, ավերվել է 1,6 հազար տուն: Նաև նշվում է էլեկտրահաղորդման գծերի ու ճանապարհների վնասվելու մասին, ժամանակավորապես դադարեցվել է օդանավակայանների, նավահանգիստների և երկաթուղային տրանսպորտի աշխատանքը:

Ինչպես հաղորդել է «Սինհուա» գործակալությունը, թայֆունի հետևանքով գետի վարարումը 395 դպրոցականների և ուսուցիչների է արգելափակել Յուննան հարավարևմտյան նահանգի Մալիպո գավառում: Նրանք գտնվում են ավանային միջնակարգ դպրոցի շենքում, որի առաջին հարկը լցվել է Բաբու գետի ջրերով: Երեխաներին և ուսուցիչներին փրկելու համար դպրոց է ուղարկվել 100 զինծառայողներից բաղկացած ջոկատ:

«Կալմեջին», որի անվանումը կորեերենից թարգմանաբար նշանակում է «ճայ», թվով 15-րդ թայֆունն է դարձել Չինաստանում: Ավելի վաղ այն հարվածել էր Ֆիլիպիններին, որտեղ հեղեղումներ էր առաջացրել և խլել հինգ մարդու կյանք, հաղորդել է ԻՏԱՌ-ՏԱՍՍ գործակալությունը: