Ուկրաինան ՆԱՏՕ-ին անդամակցություն չի խնդրում, բայց «դա նկատի ունի». Պորոշենկո

Ուկրաինան, «ելնելով քաղաքավարությունից», առայժմ չի խնդրում իրեն ընդունել ՆԱՏՕ, բայց նկատի ունի դրա հնարավորությունը: Այդ մասին, ինչպես տեղեկացնում է «Արմենպրես»-ը, հայտարարել է Ուկրաինայի նախագահ Պյոտր Պորոշենկոն՝ Վաշինգտոնում ելույթ ունենալով Ատլանտյան խորհուրդ փորձագիտական կազմակերպությունում:

«Մենք բավականաչափ քաղաքավարի ենք այժմ ՆԱՏՕ-ին անդամակցություն խնդրելու համար, բայց մենք դա նկատի ունենք»,- ասել է Պորոշենկոն: Նրա խոսքով՝ «Ուկրաինան այժմ դարձել է ավելի ուկրաինամետ ու եվրոպամետ, քան երբևիցե»:

«Մենք միավորեցինք Եվրոպան, կարո՞ղ եք դրան հավատալ»,- ասել է Ուկրաինայի ղեկավարը՝ վկայակոչելով Եվրոպայի և ԱՄՆ-ի կողմից Ռուսաստանի դեմ պատժամիջոցների սահմանումը:

Պորոշենկոն սեպտեմբերի 18-ին ավարտել է այցն ԱՄՆ, որի ընթացքում բանակցություններ է վարել նախագահ Օբամայի հետ, ինչպես նաև ելույթ ունեցել ամերիկացի կոնգրեսականների առջև:

ԱՄՆ-ի ղեկավարը հայտարարել է, որ իր երկիրն աջակցում է ուկրաինական հակամարտության դիվանագիտական կարգավորմանը: Սպիտակ տանը Պորոշենկոյի հետ կայացած հանդիպումից հետո Օբաման հայտնել է, որ ԱՄՆ-ն Ուկրաինային կտրամադրի 46 մլն դոլարի չափով օգնության նոր փաթեթ: Իր կողմից Պորոշենկոն լրագրողներին ասել է, որ գոհ է ԱՄՆ-ի օգնությունից:

Միևնույն ժամանակ, Ուկրաինայի նախագահի խոսքով, Օբաման Կիևին մերժել է ՆԱՏՕ-ից դուրս ԱՄՆ-ի դաշնակցի հատուկ կարգավիճակի տրամադրումը: Պորոշենկոն պարզաբանել է, որ, Օբամայի կարծիքով, ներկայումս ԱՄՆ-ի և Ուկրաինայի միջև փոխգործակցության մակարդակը «զգալիորեն ավելի բարձր է, քան դա պահանջում է ՆԱՏՕ-ից դուրս դաշնակցի կարգավիճակը», հաղորդել է ՌԻԱ Նովոստին: