ԱՀԿ-ն դեմ է արտահայտվել Էբոլա վիրուսով ախտահարված երկրները մեկուսացնելուն

Առողջապահության համաշխարհային կազմակերպությունը (ԱՀԿ) վերստին դեմ է արտահայտվել այն երկրներ միջազգային ուղերությունները կամ դրանց հետ առևտուրը սահմանափակելուն, որոնցում Էբոլա վիրուսի բռնկում է գրանցվել: Ինչպես տեղեկացնում է «Արմենպրես»-ը, այս որոշումն ընդունվել է ԱՀԿ-ի արտակարգ կոմիտեի երկրորդ խորհրդակցության արդյունքում: Այն սեպտեմբերի 16-ից մինչև 21-ը տեղի է ունեցել Էլեկտրոնային փոստով հաղորդագրությ ունների և հաշվետվությունների փոխանակման ռեժիմով, իսկ խորհրդակցության արդյունքներն ամփոփվել են սեպտեմբերի 22-ին:

«Կոմիտեն վճռականորեն վերստին հայտարարել է, որ չպետք է ընդհանուր արգելք սահմանվի միջազգային ուղևորությունների կամ առևտրի վրա»,-նշվում է տարածված հաղորդագրության մեջ: Ընդսմին կոմիտեի անդամներն ընդգծում են, որ այն երկրներ չվերթները սահմանափակելու առանձին ավիաընկերությունների որոշումը, որտեղ մոլեգնում է վիրուսը, հանգեցնում է միայն դրանց մեկուսացման և, որպես հետևանք, «բացասական տնտեսական հետևանքների»:

Բոլոր երկրներին հանձնարարվում է ուժեղացնել իրենց պատրաստությունը վիրուսի ներթափանցման հնարավոր դեպքերի նկատմամբ, որից ներկա պահին գոյություն չունի պաշտոնապես գրանցված պատվաստանյութ կամ դեղորայք, ինչպես նաև շարունակել բուժանձնակազմի ուսուցումը:

Փորձագետները խոստովանել են, որ վիրուսի ներկայիս բռնկումը, որն ամենաընդգրկունն ու մահաբերն է դարձել վերջին 40 տարվա ընթացքում, շարունակում է մնալ հանրային առողջապահության բնագավառի արտակարգ իրադրություն, որը միջազգային նշանակություն ունի:

Էբոլա վիրուսով պայմանավորված հիվանդության համաճարակն Արևմտյան Աֆրիկայում արդեն ավելի քան 2,6 հազար մարդու կյանք է խլել, վարակված են ավելի քան հինգ հազարը: Գործնականում մահվան ու վարակման բոլոր դեպքերը բաժին են ընկնում երեք երկրի՝ Լիբերիային, Սիեռա Լեոնեին և Գվինեային:

Առողջապահության համաշխարհային կազմակերպության տնօրեն Մարգարեթ Չենը ներկայիս համաճարակը համարել է «խաղաղ ժամանակ խոշորագույն մարտահրավերը, որին ՄԱԿ-ին երբևիցե հարկ է եղել բախվել»: