Քեթրին Լիչի համար դժվար է ընդհանուր դասեր քաղել Շոտլանդիայի հանրաքվեից

Շոտլանդիան կշարունակի մնալ Մեծ Բրիտանիայի կազմում և չորս ժողովուրդները կշարունակեն միասնական պահել Միացյալ Թագավորությունը: Հայաստանում ԱՄՆ դեսպան Քեթրին Լիչը խոստովանում է, որ ուրախ է իր երկրի միասնականության պահպանման համար, նաև հպարտ, որ հանրաքվեն անցկացվել է խաղաղության պահպանման սկզբունքի հիման վրա: «Արմենպրես»-ի փոխանցմամբ «Մեդիա կենտրոն»-ում կայացած հանդիպման ժամանակ դեսպանն ասաց, որ քվեարկությունը միայն ստատուս քվոյի համար չէր, որովհետև Շոտլանդիան քվեարկեց ավելի հզոր խորհրդարան ունենալու համար, որի կայացմանը պետք է աջակցի Միացյալ Թագավորությունը: «Միասնականությանը կողմ երեք կուսակցությունները համաձայնեցին, որ ավելի շատ պարտավորություններ կպատվիրակեն Շոտլանդիայի խորհրդարանին: Լավ է, որ Շոտլանդիայի պարագայում վերանայում ենք մեր իրավունքները, սակայն մնացած երեք ժողովուրդներն էլ պետք է ունենան վերանայված իրավունքներ: Հասել ենք այն կետին, որ արագ կերպով պետք է այդ զարգացումները տեղի ունենան»,- ասաց դեսպանը՝ հավելելով, որ քվեարկության ժամանակ ռեկորդային ակտիվություն է արձանագրվել:

«Հպարտ ենք տեսնելու, թե ինչ ակտիվությամբ է Շոտլանդիայի ժողովուրդը քվեարկում: Մեր անելիքն է նայել առաջ և հասկանալ, թե ինչ կարող ենք անել միասնական ուժերով: Սա հնարավորություն էր ժողովրդին՝ արտահայտվելու: Ժողովուրդը արտահայտվեց. արդյունքները պարզ էին և ընդունելի»,- ասաց դեսպանը՝ հավելելով, որ իրենց երկրում բոլոր ուժերը հետևում էին խաղաղության սկզբունքի պահպանմանը և նաև դրանով է առանձնանում Շոտլանդիայի հանրաքվեն: Անդրադառնալով այն հարցին, թե ինչպես կարող է Շոտլանդիայի հանրաքվեն ազդակ հանդիսանալ ինքնորոշում իրավունք պահանջող այլ ժողովուրդների համար, դեսպանն ասաց, որ դժվար է ընդհանուր դասեր քաղել, քանի որ յուրաքանչյուր դեպք պետք է գտնի իր անհատական լուծումը:

Շոտլանդիայում սեպտեմբերի 18-ին կայացել է հանրաքվե, որի ընթացքում տարածաշրջանի բնակիչները որոշում էին՝ մնալ արդյոք Միացյալ Թագավորության կազմում, թե դառնալ անկախ պետություն: Ըստ վերջին տվյալների՝ Մեծ Բրիտանիայի միասնության պահպանման օգտին արտահայտվել է հանրաքվեին մասնակցածների 55 տոկոսը, դեմ՝ 45 տոկոսը:

Անկախ Շոտլանդիայի կողմնակիցները, սակայն, կոչ են անում վերանայել հանրաքվեի արդյունքները՝ մատնանշելով ձայների հաշվման ընթացքում տեղ գտած կեղծումները: Այդ առնչությամբ տասնյակ հազարավոր շոտլանդացիներ համապատասխան պահանջագրեր են ստորագրում համացանցում: Change.org պորտալում զետեղված հանրագիրն արդեն ստորագրել է ավելի քան 88 հազար մարդ: Դրա հեղինակները նշում են հանրաքվեի ընթացքում «կեղծումների անհաշիվ վկայությունները» և պահանջում են նոր քվեարկություն անցկացնել՝ «անաչառ միջազգային կողմերի» ներգրավմամբ: