Ուկրաինան և ԵՄ-ն համաձայնեցրել են դիրքորոշումները գազի շուրջ ՌԴ-ի հետ բանակցելու համար

Ուկրաինայի վարչապետ Արսենի Յացենյուկը   Եվրահանձնաժողովի փոխնախագահ Գյունտեր Էթինգերը, որը պատասխանատու է էներգետիկայի համար, համաձայնեցրել են Ուկրաինայի   ԵՄ-ի դիրքորոշումները գազի շուրջ Ռուսաստանի հետ հերթական բանակցությունների նախաշեմին, որոնք պլանավորված են սեպտեմբերի 26-ին:

Այդ մասին, ինչպես տեղեկացնում է «Արմենպրես»-ը, հաղորդել է Ուկրաինայի նախարարների կաբինետի մամուլի ծառայությունը՝ ամփոփելով Յացենյուկի և Էթինգերի միջև սեպտեմբերի 23-ին Կիևում կայացած հանդիպման արդյունքները:

«Կառավարության ղեկավարը Եվրահանձնաժողովի փոխնախագահի հետ քննարկել է Ուկրաինային ռուսական գազի մատակարարումների շուրջ Ռուսաստանի Դաշնության հետ եռակողմ բանակցությունների ընթացիկ վիճակն ու հեռանկարները: Համաձայնեցնելով դիրքորոշումները՝ Յացենյուկն ու Էթինգերը հավաստել են թափանցիկության և գազի գնի ձևավորման նկատմամբ շուկայական մոտեցման սկզբունքներով համաձայնության հասնելու ընդհանուր ձգտումը»,-նշել է մամուլի ծառայությունը՝ չճշտելով համաձայնեցված դիրքորոշումների բովանդակությունը:

Սեպտեմբերի 26-ին Բեռլինում կկայանա գազի շուրջ հերթական եռակողմ հանդիպումը ՌԴ-Ուկրաինա-ԵՄ ձևաչափով: Մոսկվան և Կիևը մինչ այժմ չեն կարողանում համաձայնեցնել Ուկրաինայի համար ռուսական գազի գինը: Ռուսաստանն առաջարկում է «Գազպրոմ»-ի և «Նաֆտոգազ»-ի փոխադարձ հայցերի քննարկման ժամանակաշրջանում 385 դոլար ժամանակավոր գին սահմանել հազար խորանարդ մետրի դիմաց: Իր հերթին ՈՒկրաինայի վարչապետն առաջարկել է գնի երկու տարբերակ՝ ամռանը՝ 300 դոլար, ձմռանը՝ 380 դոլար, հաղորդել է ՌԻԱ Նովոստին: