«Ուկրաինայի իրադրության կարգավորման գործում կան «փոքր հաջողություններ»». Մերկել

Գերմանիայի կանցլեր Անգելա Մերկելն այն կարծիքին է, որ Ուկրաինայի իրադրության կարգավորման գործում առկա է ոչ մեծ առաջընթաց, բայց իսկական հաջողությունը դեռ հեռու է:

«Ուկրաինայի ճգնաժամը խորը հակամարտություն է: Մենք ունենք փոքր հաջողություններ, բայց իսկական լուծումը դեռ հեռու է»,-ասել է Մերկելը Բեռլինում՝ ելույթ ունենալով Գերմանիայի արդյունաբերության օրվան նվիրված միջոցառմանը, տեղեկացնում է «Արմենպրես»-ը:

Կանցլերի խոսքով՝ իրադրության ողջ լրջությամբ հանդերձ, Գերմանիան և Եվրամիությունը պահպանում են Ռուսաստանի հետ բանակցություններ վարելու կապուղիները: «Մենք փորձում ենք բանակցություններ վարել»,-ասել է նա:

Մերկելի համոզմամբ՝ այն դեպքում, երբ «չի հարգվում երկրի տարածքային ամբողջականությունը, Եվրոպայում խաղաղ գոյակցությունը վտանգված է»: «Ուկրաինան, ինչպես որ ցանկացած այլ պետություն, իրավունք ունի որոշելու իր Սահմանադրությունը, հասարակական, տնտեսական ու միջազգային գերակայությունները»,-ասել է կանցլերը:

Ինչպես արդեն հաղորդվել է, Ուկրաինայի արևելքում աշխարհազորայինները, Մինսկի պայմանավորվածություններին համապատասխան, հրետանային ստորաբաժանումները հետ են քաշել ուկրաինական զորքերի հետ շփման գծից: Լուգանսկի մարզում ուկրաինացի ուժայինները նույնպես ձեռնամուխ են եղել ավելի վաղ զբաղեցրած դիրքերից ռազմական տեխնիկայի ու հրետանու մասնակի հետքաշմանը:

Կիևի իշխանությունները և Դոնբասի աշխարհազորայինները Մինսկում բանակցություններ են վարում Ռուսաստանի և ԵԱՀԿ-ի միջնորդությամբ: Սեպտեմբերի 5-ին նրանք համաձայնեցրել են հրադադարը և տարածաշրջանի կարգավիճակին վերաբերող մի շարք հարցեր, իսկ սեպտեմբերի 15-ին դրա իրագործման համար մշակել են ինը կետից բաղկացած հուշագիր: Այն պայմանավորվածություններ է ներառում համընդհանուր հրադադարի, շփման գծում անվտանգության գոտու ստեղծման, այդ գոտուց և բնակավայրերից ծանր սպառազինությունների դուրսբերման և ԵԱՀԿ-ի մոնիթորինգային առաքելության ծավալման մա սին, հաղորդել է ՌԻԱ Նովոստին: