Alibaba-ի հիմնադիր Ջեկ Ման դարձել է Չինաստանի ամենահարուստ մարդը

Alibaba ինտերնետ-ընկերության հիմնադիր Ջեկ Ման գլխավորել է Hurun Rich List-ի՝ Չինաստանի միլիարդատերերի ամենամյա վարկանիշը, որը հրապարակվել է սեպտեմբերի 23-ին, տեղեկացնում է «Արմենպրես»-ը:

Ինչպես հաղորդել է The Wall Street Journal-ը, վարկանիշը կազմող Hurun Report վերլուծական ընկերությունը Մայի և նրա ընտանիքի կարողությունը Alibaba-ի՝ անցած շաբաթ ավարտված IPO-ից հետո գնահատել է 25 մլրդ դոլար: Հիմնական ակտիվները Alibaba-ում և Alipay վճարային համակարգում ունեցած մասնաբաժիններն են:

Առաջին տասնյակում տեղ են գրավել բարձրտեխնոլոգիական սեկտորի ևս չորս ներկայացուցիչներ՝ Tencent Holdings, Baidu, JD.com ինտերնետ-ընկերությունների և Xiaomi սմարթֆոններ արտադրողի թոփ-մենեջերները:

Անցած տարվա վարկանիշի առաջնորդ Վան Ցզյանլինը 24,2 մլրդ դոլար կարողությամբ իջել է երկրորդ հորիզոնական: Նա գլխավորում է Dalian Wanda Group Corp.-ի տնօրենների խորհուրդը, կոնգլոմերատ, որը շահեր ունի անշարժ գույքի ոլորտում և զվարճանքի ինդուստրիայում:

Alibaba-ի IPO-ն խոշորագույնն է դարձել աշխարհում: Ընկերության կապիտալիզացիան բաժնետոմսերի տեղաբաշխման արդյունքում հասել է 231,4 մլրդ դոլարի՝ գերազանցելով Facebook-ի, Procter & Gamble-ի և JPMorgan Chase-ի շուկայական արժեքը, հաղորդել է «Ինտերֆաքս»-ը: