Էբոլայով վարակվելու դեպքերի 70 տոկոսը մահվան են հանգեցնում. ԱՀԿ

Առողջապահության համաշխարհային կազմակերպության վերջին տվյալների համաձայն՝ Արևմտյան Աֆրիկայում Էբոլա տենդով հիվանդացած մարդկանց 70 տոկոսը մահացել է: Մահացության մակարդակն ավելի բարձր է եղել, քան ենթադրվում էր ավելի վաղ, տեղեկացնում է «Արմենպրես»-ը՝ հղում անելով BBC-ին:

ԱՀԿ-ն նախազգուշացնում է, որ մինչև նոյեմբեր տենդով հիվանդանալու դեպքերի թիվը կարող է եռապատկվել և հասնել 20 հազարի, եթե շտապ միջոցներ չձեռնարկվեն համաճարակի դեմ պայքարում:

Ներկայումս Գվինեայում, Լիբերիայում և Սիեռա Լեոնեում այդ վիրուսից մահացել է արդեն 2800 մարդ: ԱՀԿ-ում նշել են, որ Սենեգալում և Նիգերիայում հիվանդության բռնկումները վերահսկվում են:

Wellcome Trust բրիտանական բարեգործական կազմակերպությունը հայտարարել է, որ Արևմտյան Աֆրիկայում առաջին անգամ կփորձարկվեն Էբոլայի դեմ մշակված փորձարարական դեղամիջոցներ: Դրանց թվում է zMapp պատրաստուկը, որով արդեն բուժել են տենդով հիվանդացած մի քանի բժիշկների: