Ուկրաինայի ԱԳ նախարարը չի մասնակցի ԱՊՀ-ի իր պաշտոնակիցների նիստին

Ուկրաինայի արտաքին գործերի նախարար Պավել Կլիմկինը ներկա չի լինի ԱՊՀ-ի երկրների ԱԳ նախարարների խորհրդի նիստին, որը հոկտեմբերի 9-ին տեղի կունենա Մինսկում: Այդ մասին, ինչպես տեղեկացնում է «Արմենպրես»-ը, ՌԻԱ Նովոստիին հայտնել է Բելառուսի ԱԳՆ-ի պաշտոնական ներկայացուցիչ Դմիտրի Միրոնչիկը:

«Բելառուսում Ուկրաինայի դեսպանությունը նոտայով մեզ պաշտոնապես ծանուցել է այն մասին, որ Ուկրաինայի արտաքին գործերի նախարարը չի մասնակցելու նիստին»,-ասել է Միրոնչիկը:

Նա ճշտել է, որ միջոցառմանը Ուկրաինան կներկայացնի Բելառուսում հանրապետության դեսպան Միխայիլ Եժելը:

Ինչպես ավելի վաղ հաղորդել է Ռուսաստանի ԱԳ նախարարությունը, ԱՊՀ-ի արտաքին գործերի նախարարները Մինսկում կհամաձայնեցնեն հումանիտար համագործակցության փաստաթղթերը, ինչպես նաև կքննարկեն 2015-2019 թվականներին անօրինական միգրացիային հակազդելու ուղղությամբ փոխգործակցության ծրագրի նախագիծը, տեղեկացնում է «Արմենպրես»-ը՝ հղում անելով:

ԱՊՀ-ի ԱԳ նախարարների խորհրդի նիստի օրակարգը ներառում է 13 հարց:

«Խորհրդի նիստում կհամաձայնեցվեն մի շարք փաստաթղթեր, որոնք վերաբերում են հումանիտար ոլորտում համագործակցության զարգացմանը», -ասված է ՌԴ ԱԳՆ-ի տեղեկատվության և մամուլի դեպարտամենտի՝ նիստի նախօրյակին արված մեկնաբանության մեջ:

Նաև նշվում է, որ նախարարները կքննարկեն 2015-2019 թվականներին անօրինական միգրացիային հակազդելու գործում ԱՊՀ-ի երկրների համագործակցության ծրագրի և մարդավաճառությանը հակազդելու հարցում համագործակցության հայեցակարգի նախագծերը: Օրակարգում է նաև Հայրենական մեծ պատերազմում հաղթանակի 70-ամյակի տոնակատարության նախապատրաստումը:

«2015 թվականին Հաղթանակի հոբելյանին նախապատրաստվելու համատեքստում նախարարները կքննարկեն 1941-1945 թվականների Հայրենական մեծ պատերազմում խորհրդային ժողովրդի տարած մեծ հաղթանակի 70-րդ տարեդարձի կապակցությամբ Համագործակցության ժողովուրդներին և համաշխարհային հասարակայնությանը ԱՊՀ-ի մասնակից պետությունների ղեկավարների ուղերձի նախագիծը»,-նշել են ՌԴ ԱԳ նախարարությունում: