Բաֆեթը վստահ է, որ Հիլարի Քլինթոնը կհաղթի 2016 թվականի նախագահական ընտրություններում

ԱՄՆ-ի նախկին առաջին տիկին և երկրի նախկին պետքարտուղար Հիլարի Քլինթոնը կմասնակցի 2016 թվականի նախագահական մրցարշավին և հաղթանակ կտանի: Այդ մասին, ինչպես տեղեկացնում է «Արմենպրես»-ը՝ հղում անելով «Ֆրանսպրես» գործակալությանը, հայտարարել է ամերիկացի լեգենդար ներդրող Ուորեն Բաֆեթը:

66-ամյա Քլինթոնն ինքը մինչ այժմ չի հաստատել, որ պայքարելու է բարձրագույն պաշտոնի համար:

«Հիլարին կհաղթի: Ես մտադիր եմ դրա համար գումար դնել, իսկ ես նման բաներ հենց այնպես չեմ անում»,-հայտարարել է 84-ամյա Բաֆեթը Fortune հանդեսի վարկածով ամենաազդեցիկ կանանց կալիֆոռնիական համաժողովում: Նրա կարծիքով՝ Քլինթոնն իր թեկնածությունն առաջադրելու որոշման մասին կհայտարարի «հնարավորինս ուշ»:

ԱՄՆ-ի նախկին առաջին տիկինն առավել մեծ ժողովրդականությունն է վայելում 2016 թվականի նախագահական ընտրությունների 16 պոտենցիալ թեկնածուների թվում:

Ամերիկացի ձեռնարկատեր և ներդրող Բաֆեթը աշխարհի ամենահարուստ մարդկանցից մեկն է, ինչպես նաև խոշորագույն բարեգործը մարդկության պատմության մեջ: Նրա կարողությունը 2014 թվականի ապրիլի դրությամբ գնահատվում էր 66 մլրդ դոլար, հաղորդել է ՌԻԱ Նովոստին: