Ուկրաինայի ճգնաժամին ԵՄ-ի միջամտության ամենամոլի կողմնակիցները բրիտանացիներն են

Եվրամիության երկրների հիմնական եռյակի՝ Մեծ Բրիտանիայի, Գերմանիայի, Ֆրանսիայի բնակիչների կեսից պակասն է այն կարծիքին, որ ԵՄ-ն պետք է դերակատարություն ունենա Ուկրաինայի իրադրության կարգավորման գործում, Հին աշխարհի բնակիչները հակամարտության լուծման հարցում իրենց երկրների ներդրումը տեսնում են հիմնականում հումանիտար օգնություն ցուցաբերելու և խաղաղապահ առաքելության մեջ, միայն առանձին մարդիկ են հանդես գալիս Կիևի իշխանություններին դրամական վարկ հատկացնելու օգտին: Այդ մասին, ինչպես տեղեկացնում է «Արմենպրես»-ը, վկայում են ICM ընկերության հարցման արդյունքները, որն անցկացվել է «Ռուսաստանն այսօր» Միջազգային լրատվական գործակալության պատվերով:

Ուկրաինայում կատարված հանցագործությունների հետաքննությանը ԵՄ-ի մասնակցության օգտին հանդես է գալիս բրիտանացիների և ֆրանսիացիների մեծամասնությունը և գերմանացիների միայն կեսը: Դրա հետ մեկտեղ հարցմանը մասնակցած բոլոր եվրոպացիներն առաջին հերթին պահանջում են հետաքննել մարդկության դեմ կատարված հանցագործությունները:

Հետազոտության տվյալների համաձայն՝ Ուկրաինայի ճգնաժամի մասին ավելի լավ իրազեկված են Մեծ Բրիտանիայից հարցման մասնակիցները (92 տոկոս), քան մյուս երկու երկրների՝ Գերմանիայի (78 տոկոս) և Ֆրանսիայի (83 տոկոս) բնակիչները:

Ուկրաինայի իրադրությանը Եվրամիության միջամտության անհրաժեշտության մասին ընդհանուր առմամբ նշում է երեք երկրներում հարցվածների 46 տոկոսը: Հակառակ տեսակետն ունի 44 տոկոսը, և եթե Միացյալ Թագավորությունում չմիջամտելու օգտին արտահայտվել է քաղաքացիների 40 տոկոսը, Ֆրանսիայում՝ 35 տոկոսը, ապա Գերմանիայում՝ 58 տոկոսը:

Եվրամիության միջամտության քաղաքականության ամենամոլի կողմնակիցներն են բրիտանացիները (53 տոկոս), ֆրանսիացիների շրջանում այդպիսիք կազմում են 48 տոկոս, իսկ գերմանացիների շրջանում՝ միայն 36 տոոկսը: