Պենտագոնը հարյուր ծովային հետևակայինների է ուղարկել Լիբերիա՝ պայքարելու Էբոլայի դեմ

ԱՄՆ-ի պաշտպանության նախարարությունը հարյուր ծովային հետևակայինների է ուղարկում Լիբերիա՝ պայքարելու մահացու վտանգավոր Էբոլա տենդի վիրուսի տարածման դեմ, տեղեկացնում է «Արմենպրես»-ը՝ հղում անելով Agence France-Presse գործակալությանը:

Ինչպես հայտնել է ռազմական գերատեսչության պաշտոնական ներկայացուցիչ Ջոն Քիրբին, զինվորական ստորաբաժանումը Լիբերիայի մայրաքաղաք կժամանի հոկտեմբերի 9-ին: Նրա խոսքով՝ Մոնրովիա կուղարկվի նաև վեց օդանավ՝ MV-22 Osprey երկու ինքնաթիռ և C-130 Hercules ռազմափոխադրական օդանավ:

Քիրբին ճշտել է, որ Լիբերիայում հետևակայինների գլխավոր խնդիրը կլինի երկիր ԱՄՆ-ի այլ զորամասերի ժամանման նախապատրաստումը: Ավելի վաղ հաղորդվել է, որ ԱՄՆ-ը մտադիր է հազարից ավելի զինվորականներ ուղարկել Լիբերիա՝ Էբոլայի դեմ պայքարում օգնելու համար:

Մինչդեռ, ինչպես հաղորդում է Reuters գործակալությունը, Լիբերիայի նախագահ Էլեն Ջոնսոն Սերլիֆը հայտարարել է, որ միջազգային հանրակցության կողմից ցուցաբերվող օգնությունը չափազանց դանդաղ է հասնում երկիր:

«Վիրուսի դեմ պայքարում օգնելու պատրաստակամությունը շատ մեծ է: Մենք միայն կցանկանայինք, որ գործողությունները կատարվեին փոքր-ինչ ավելի արագ»,- հայտարարել է պետության ղեկավարը գործակալությանը տված հարցազրույցում: Նրա խոսքով՝ երկրում նկատվում են այն բանի որոշ նշաններ, որ տենդի տարածման արագությունը նվազում է:

ԱՄՆ-ն արդեն երեք շարժական լաբորատորիա է ծավալել Լիբերիայում, որոնց մասնագետները կզբաղվեն Էբոլա վիրուսով պայմանավորված հիվանդությամբ վարակվելու դեպքերի բացահայտմամբ:

Ավելի վաղ ԱՄՆ-ի նախագահ Բարաք Օբաման իր վարչակազմի անդամների հետ անցկացված հանդիպման ընթացքում քննարկել է Էբոլա տենդի համաճարակի հետ կապված իրադրությունը: Խորհրդակցությանը, մասնավորապես, ներկա են եղել ԱՄՆ-ի պետքարտուղար Ջոն Քերին, պաշտպանության նախարար Չաք Հեյգելը, ԱՄՆ-ի զինված ուժերի շտաբների պետերի կոմիտեի նախագահ գեներալ Մարտին Դեմփսին, առողջապահության նախարար Սիլվիա Մեթյուզ Բերվելը և բարձրաստիճան այլ անձինք:

Հանդիպման մասնակիցները պետության ղեկավարին հավաստիացրել են, որ ԱՄՆ-ի առողջապահության համակարգը պատրաստ է կանխել հիվանդության հնարավոր բռնկումը:

Առողջապահության համաշխարհային կազմակերպության տվյալների համաձայն՝ Էբոլա վիրուսի համաճարակի զոհերի թիվը, որը ներկայումս շարունակվում է Արևմտյան Աֆրիկայի երկրներում, գերազանցել է 3,8 հազարը, վարակված է ավելի քան 8 հազար 33 մարդ: Վիրուսից մահվան դեպքերի մեծ մասը բաժին է ընկնում երեք պետությունների՝ Լիբերիային, Սիեռա Լեոնեին և Գվինեային, հաղորդել է ՌԻԱ Նովոստին: