Կառավարության հետ դիմակայությունը հասել է բարձրակետին. Մարգվելաշվիլի

Վրաստանի նախագահ Գեորգի Մարգվելաշվիլին այն կարծիքին է, որ կառավարության հետ իր լարված հարաբերությունները բարձրակետին են հասել «Վրացական երազանք» կառավարող կուսակցության հիմնադիր, երկրի նախկին վարչապետ Բիձինա Իվանիշվիլիի հայտարարություններից հետո, տեղեկացնում է «Արմենպրես»-ը՝ հղում անելով «Նովոստի Գրուզիան»:

«Բանն այն է, որ բարձրակետային իրավիճակների առաջացումը սովորաբար կապված է Բիձինա Իվանիշվիլիի հայտարարությունների հետ: Ելնելով դրանից՝ եթե նա դարձյալ հարցազրույց տա, ապա կլինեն նաև հուզումներ»,- ասել է Մարգվելաշվիլին Forbes Georgia հանդեսում հրապարակված հարցազրույցում՝ պատասխանելով լրագրողի հարցին:

Իր հարցազրույցում նախագահը նաև նշել է, որ Իվանիշվիլիի հետ վերջին տասն ամիսների ընթացքում չի շփվել: «Ես արդեն տասն ամիս (անձնական) շփումներ չեմ ունեցել Բիձինա Իվանիշվիլիի հետ: Միևնույն ժամանակ նրա երկու հրապարակային հայտարարություններում իմ վերաբերյալ հնչել է քննադատություն, որին ես չեմ կարող պատասխանել, քանի որ դրանում քաղաքական ենթատեքստ չի եղել: Չէ որ նա չի խոսում այն մասին, թե ես այլ քաղաքական կողմնորոշիչ եմ ընտրել: Խոսքը վերաբերում է դարձյալ այն արտահայտություններին, որոնք վերցված են մեր անձնական հարաբերություններից, զգացողություններից, հույզերից: Այդ մասին քաղաքական գործիչները չպետք է խոսեն»,- նշել է Մարգվելաշվիլին: