«ՆԱՏՕ-ի հետ Վրաստանի համագործակցությունը վտանգավոր չէ տարածաշրջանի համար». Աբաշիձե

ՆԱՏՕ-ի հետ Վրաստանի համագործակցությունը ոչ մի վտանգ չի ստեղծում տարածաշրջանային անվտանգության համար: Այդ մասին, ինչպես տեղեկացնում է «Արմենպրես»-ը, հոկտեմբերի 9-ին հայտարարել է Վրաստանի վարչապետի՝ Ռուսաստանի հետ հարաբերությունների կարգավորման հարցերով հատուկ ներկայացուցիչ Զուրաբ Աբաշիձեն՝ մեկնաբանելով ՌԴ ԱԳ նախարարության արած հայտարարությունը:

Ինչպես նախօրյակին նշել են Ռուսաստանի ԱԳ նախարարությունում, ի շահ ՆԱՏՕ-ի Վրաստանում ռազմական ենթակառուցվածքի ներդրումը սպառնալիք կստեղծի անդրկովկասյան տարածաշրջանում հաստատվող կայունության համար: Հայտարարությունը տարածվել էր Ժնևյան բանակցությունների հերթական փուլի կապակցությամբ, որը տեղի է ունեցել հոկտեմբերի 7-8-ին:

«ՆԱՏՕ-ի հետ մեր համագործակցությունը ոչ մի վտանգ չի ստեղծում տարածաշրջանային անվտանգության համար: Տարածաշրջանային անվտանգությանը վնաս են հասցնում, շատ լուրջ խնդիրներ են ստեղծում չլուծված հակամարտությունները, և հատկապես դրանում ենք մենք տեսնում Ռուսաստանի դերը: Սա ամենաբարդ խնդիրներից մեկն է Ռուսաստանի հետ արևմտյան երկրների հարաբերություններում»,-լրագրողներին ասել է Զուրաբ Աբաշիձեն, հաղորդել է «Նովոստի Գրուզիա»-ն: