Մոսկվայում դրական են գնահատում Վրաստանի հետ համագործակցության արդյունքները

Մոսկվայում դրական են գնահատում ոչ պաշտոնական երկխոսության շրջանակներում վերջին երեք ամսվա ընթացքում Վրաստանի հետ համագործակցության արդյունքները: Այդ մասին, ինչպես տեղեկացնում է «Արմենպրես»-ը, հայտնել են ՌԴ ԱԳ նախարարությունում՝ ամփոփելով Վրաստանի վարչապետի հատուկ ներկայացուցիչ Զուրաբ Աբաշիձեի և Ռուսաստանի արտաքին գործերի փոխնախարար Գրիգորի Կարասինի հանդիպման արդյունքները, որը հոկտեմբերի 16-ին կայացել է Պրահայում:

«2013 թվականին ռուսական շուկա վրացական գինու, հանքային ջրի և գյուղատնտեսական արտադրանքի վերադարձի հարցի հաջող կարգավորումից հետո նկատվում է փոխադարձ ապրանքաշրջանառության կայուն աճ,-ընդգծել են Ռուսաստանի դիվանագիտական գերատեսչությունում: -Ընթացիկ տարվա ութ ամսում 2013 թվականի նույն ժամանակաշրջանի համեմատությամբ այն աճել է 34 տոկոսով և կազմել 486 մլն դոլար: Ընդսմին Ռուսաստան վրացական արտահանումն աճել է գրեթե 3,5 անգամ՝ կազմելով շուրջ 180 մլն դոլար»:

Կողմերը երկկողմ առևտրի հետագա աճին նպաստելու երկուստեք ձգտում են արձանագրում: «Դրան կնպաստի նաև ռուսական ու վրացական բիզնեսի ներկայացուցիչների՝ այս տարվա նոյեմբերին Թբիլիսիում կայանալիք հանդիպումը, որը կազմակերպվում է առևտրաարդյունաբերական պալատների նախաձեռնությամբ»,-նշել են ՌԴ ԱԳ նախարարությունում:

«Սեպտեմբերին պաշտոնական բնույթ են ստացել կանոնավոր օդային հաղորդակցություն իրականացնելու շուրջ պայմանավորվածությունները, սկզբնապես Մոսկվայի և Թբիլիսիի միջև: Արձանագրվել է խոչընդոտների բացակայությունը թռիչքների աշխարհագրության հետագա ընդլայնման համար»,-նշել են նախարարությունում:

Հանդիպման մի մասը նվիրված է եղել Ռուսաստանի և Աբխազիայի միջև նոր պայմանագրի նախագծին: Այդ կետն օրակարգում ներառված չէր և արծարծվել է Վրաստանի նախաձեռնությամբ: «Ռուսական կողմը համապատասխան պարզաբանումներ է արել միջպետական այդ փաստաթղթի բովանդակության ու նպատակների շուրջ»,-ասել են դիվանագիտական գերատեսչությունում:

Նույն ձևաչափով նոր հանդիպման ամսաթիվը կորոշվի ավելի ուշ, հաղորդել է ՏԱՍՍ-ը: