«ԵՄ-ի ղեկավարները դրական զարգացում են տեսնում Ուկրաինայի ճգնաժամի լուծման գործում». Ռոմպյոյ

Եվրամիության ղեկավարները դրական զարգացում են նշում Ուկրաինայի ճգնաժամի կարգավորման գործում: Այդ մասին, ինչպես տեղեկացնում է «Արմենպրես»-ը, հոկտեմբերի 17-ին լրագրողներին հայտարարել է Եվրախորհրդի նախագահ Հերման վան Ռոմպյոյը՝ ամփոփելով Միլանում «Ասիա-Եվրոպա» ֆորումի (ACEM) գագաթնաժողովի շրջանակներում կայացած աշխատանքային նախաճաշի արդյունքները:

«Մենք երջանիկ ենք տեսնել գործընթացի դրական զարգացումը,-նշել է վան Ռոմպյոյը:-Մենք եկել ենք այն եզրակացության, որ կրակի դադարեցման և խաղաղության ծրագրի վերաբերյալ Մինսկի արձանագրությունը շատ մեծ կարևորություն ունի և այն պետք է իրագործել: Դա երաշխավորում է Ուկրաինայի ապագան: Ուստի «իրագործում» բառն ամենահանգուցայինն է այստեղ»:

Նրա խոսքով՝ հոկտեմբերի 17-ին տեղի ունեցած աշխատանքային նախաճաշի մասնակիցները համաձայնել են շարունակել բանավեճերն Ուկրաինայի իրադրությանը վերաբերող երկու կարևոր հարցերի շուրջ: «Դրանք երկու յուրահատուկ, բայց շատ կարևոր թեմաներ են՝ առաջիկա ընտրությունների կազմակերպումը և սահմանների մոնիթորինգը: Եզրակացություն է արվել, որ այդ հարցերն անհրաժեշտ է քննարկել թե այսօր, թե հաջորդ օրերին»,-նշել է Եվրախորհրդի ղեկավարը:

Միլանում Ռուսաստանի և Ուկրաինայի նախագահների՝ Վլադիմիր Պուտինի և Պյոտր Պորոշենկոյի մասնակցությամբ աշխատանքային նախաճաշը շարունակվել է գրեթե մեկուկես ժամ: Հանդիպմանը մասնակցել են նաև Իտալիայի վարչապետ Մատեո Ռենցին, Մեծ Բրիտանիայի վարչապետ Դևիդ Քեմերոնը, Գերմանիայի կանցլեր Անգելա Մերկելը և Ֆրանսիայի նախագահ Ֆրանսուա Օլանդը, ինչպես նաև Եվրախորհրդի նախագահ Հերման վան Ռոմպյոյը և Եվրահանձնաժողովի ղեկավար Ժոզե Մանուել Բառոզուն:

Պուտինը հանդիպումը գնահատել է «լավ, դրական», հաղորդել է ՏԱՍՍ-ը: